لا ترتبكْ !
مساء يوم الاربعاء الماضي كنت بالغرفة جالس وطاقتني الهواجيس وما وعيت الا الوالدة تناديني بأعلى صوتها .. وأجي أركض بكل ما أوتيت من قوة وانا نازل من الدرج وإلا الوالده واضحه عليها ملامح الروعة والخوف .. قلت وش فيك ؟؟ قالت رح لأبوك .. وأكمل مسلسل الركض لمجلس الوالد وأدخل وإلاه واقف ومرتاع أكثر من الوالدة أنا بلّمت والله وأرتعت أكثر منهم .. قلت وششش العلم يبه ؟ ويمد لي الجوال قال شف اخوك وش فيه !! ويحط يده على راسه ينتظر الخبر مني .
أخذت الجوال وشفته .. قلت يبه هذي رسالة .. ومن أخوي اللي اشوف وش فيه ؟ ( لإني وقتها ماستوعبت الموقف ابد ) !
قال ما قريت وش مكتوب ؟ قلت الا !!! قال طيب دق عليه.. بنبرة حادة !
قلت يبه ادق على مييين؟ هذي رسالة اعلانية !! وسكت شوي يناظرني ثم بأعلى صوتها الوالدة : حسبي الله عليهم حسبي الله عليهم ، والوالد مسك خط بالسب والتنتيف في هاللي ارسل الرسالة.
والحمدلله اني كنت موجود وقتها بالبيت .. ما كان في البيت الا انا والوالد والوالدة -الله يطوّل أعمارهم على العز والطاعة- بس .. ولو كانوا لحالهم وطوّلوا على حالة هالرعب الله أعلم وش بيصير فيهم !
يمكن بعضكم الى الآن مايدري وش السالفة .. السالفة ومافيها ان حبايبنا في الهلال الأحمر السعودي مسكت معهم الله يجزاهم خير يسوقون لموقعهم على الانترنت وأرسلوا رسالة بالنص هذا “عزيز لك.. لديه حالة طبية طارئة.. لا ترتبك” وبأسفل الرسالة ختموها بكلمة تعلم معنا وحاطين رابط الموقع.
وقت ماوصلت الرسالة كان أخوي ماسك خط وراجع من السفر وأول ما قراها الوالد أول ماتبادر لذهنه أن أخوي صار له شي بالطريق والمصيبة الاعظم انه دق عليه ولا رد فسببت لنا هالرسالة كل هالرجه في البيت
ممكن البعض يستوعب الرسالة من اول ما يقراها بوجود رابط الموقع وغيره ، لكن ماحسبوا حساب ان الجوال الآن في يد كبير سن وكبيرة سن ومثل هالكلمات التسويقية المروّعة ممكن تسبب لهم صدمة نفسية ومشاكل مايعلم بها الا الله ؟ ما كان عندهم صيغة ألطف وأكثر تفاؤل من هالصيغة التشاؤمية المروّعة ؟ ما حسبوا حساب ان كثيرين ممن توصلهم الرسالة ماعندهم خلفية عن مواقع الانترنت وبيظنون الرسالة موجهه لهم شخصياً ؟
من جريدة الرياض:
المواطن سلمان السبيعي كان أحد ضحايا هذه الرسالة عندما تلقى الرسالة ووالدته في المستشفى يقول شعرت بأن حالة والدتي في خطر وانه يجب علي أن أتوجه للمستشفى فوراً، وعند الاتصال بإحدى شقيقاتي وجدت الوالدة ولله الحمد انها في صحة جيدة، وأنا أتساءل من المسؤول عن إرسال هذه الرسالة
رد الدكتور موفق البيوك !
من جانبها قامت “الرياض” بالاتصال بمدير الخدمات الطبية الطارئة “الإسعاف” الدكتور موفق البيوك والذي قال ان هذه الرسائل الهدف الرئيسي منها هو التوعية بشكل عام وتعريف المواطنين في مواجهة الكوارث والطوارئ وكيفية التعامل معها.
يخلف على الله على امن جابت اللي صاغ هالرسالة بهالاسلوب .. قال توعية قال !
27 أبريل 2008 في الساعة 11:55 ص
لية يرسلون اصلن ..!!
مافي داعي يرسلون على الارقام والجوالات لو الدفاع المدني نقول يلله معلية تنبلع ( مع ان الدفاع المدني طول عمرة يوصل لمكان الحريق والسيارة مافيها ماي ويرجعون )
الحمدلله ان جات ع كذا
وعادي تشوف العجب وتصوم رجب ..
مو غريبة على حدماتنا في هالبلد
27 أبريل 2008 في الساعة 3:41 م
حسبي الله على ابليسهم ،، بالله هذا اسلوب ؟
،،
يبدو أن أحد رسامي الجزيرة وصلته الرسالة ،، وصار له زي الي صار لك
الكاريكاتير من هنا ،،
الحمد لله على سلامتكم بس
،،
27 أبريل 2008 في الساعة 4:34 م
زيين والله انك كنت موجود عند اهللك
على الاقل سويت شي زين بـ حياتكك
هههههههههههههههه ياخي قسم بالله ماادري وش يبون
ذولا .. الظاهر انهم يسمعون بـ أسلوب لفت الانتباه وجذب الناس
نفس الحاله صارت والله عندي
يوم الخميس كنّا مربعين ” نلعب بلوت”
وكنت مدهر .. والخوي جته رساله .. فتح يبي يقراها وهو يلعب
اشوفه ماغير يقطع .. العب له ديمن يلعب لي هاص ..
العب له شريا يلعب ديممن
وأشوف وش السالفه .. اثرهم مرسلين له هـ الرساله
ولعبت بـ حسبته وتخزبق .. وتكوشت علينا بعد
اخسكم الله من اسعاف .. والله يـ أنتم تسمعون بـ الأسلوب
تشكرات موسععن
لاتطول رحم الله والديكك ..!
27 أبريل 2008 في الساعة 5:42 م
الحمدلله ع السلامة
أنها جَت سليمة هالمرة ..
من جد ماعندهم أسلوب ..
وانا سمعت فيه ذيك الليلة أرسلوا لنصف العملاء
بشركة الأتصالات والكل صار يحكي عن هالسالفة
لكن توعيتهم بهالشكل الخاطئ اللي أنتقل إعلانهم
من إرشاد وتعليم إلى إصابات وذعر ( مُشكلة )
واكثر ما أضحكني الكاريكاتير اللي ارفقه أخي عبدالمجيد
جاي بالصميم والله !!
يعطيك العافيه يبو داحم
27 أبريل 2008 في الساعة 6:40 م
أنا أقولك وش السالفه …
هذا طال عمرك موظفين لهم كم واحد يسمعون بالتشويق ..
وبغو يسوون زي المسجات اللي بدايتها تخوف ولما تنزل تحت يطلع شئ ثاني
مثل : ( ياجعله يموت ) ولما تنزل (اللي مايحبك) …
وحبو يسوون مقلب في المواطنين ..
خبرك مطيحين الميانه هم ..
لو بحلف اللي سوا الحمله الاعلانيه هذي … سواها وهو يلعب ورقه
موضوع له صله بموضوعك :
http://www.alghaslan.net/2008/04/sms.html
وشوف الفرق
27 أبريل 2008 في الساعة 7:46 م
لا حول ولا قوة إلا بالله
صدق ما قلت اخي فعلا الكثير من الرسائل والاعلانات تكن مفزعة اكثير منها ملفتة للانتباه
27 أبريل 2008 في الساعة 10:46 م
عادي.. إحدى البصمات السعودية!!
إذا حاولوا يسوا أي شي زين.. طينوها!!!!
حسبي الله عليهم ونعم الوكيل..
هذول ربي سلمهم..
لو واحد عنده القلب لا سمح الله وجاه شي.. مين ياخذ جزاه؟؟
28 أبريل 2008 في الساعة 12:12 ص
صدقت يا عبدالرحمن ..
..
نفس الرسآلة وصلت لجوآل الوآلدة
كآن ذآك الوقت الحديث اللي يدور بينا عن أحد أبناء العائلة ؛ وكآن مُصاب في المستشفى !
فلمّا وصلت الرسآلة ..
لا تسأل ما حدث ذآك الوقت !
كنّا نرى تعابير وجهها ونلتزم الصمت ؛ لكن على ما يبدو أنها أعادت قرائَتها عدة مرات !
حتى فهمت بالضبط المقصد من الرسالة ..
إكتفت برمي الجوآل على إخوتي وهيْ تقول : هذا اللي فلحوا فيه ! يروعون الواحد ..
* ما نرفض التوعية أبداً بل هيَ شئ مطلوب !
لكن التوعية بلا إسلوب ؛ مرفوضة حتماً ..
شكراً عبدالرحمن ؛ وعذراً على الإطالة : ) ..
28 أبريل 2008 في الساعة 4:42 ص
الحمد لله على العافية بس!
يعني اللي عمل الصياغة ما شغل مخه شويتين وفكر! لا واللي يضحك ويقهر في نفس الوقت انه الهلال الأحمر يرمي الغلط على الاتصالات والاتصالات تقول لا مو أنا!!
28 أبريل 2008 في الساعة 11:25 ص
مضيعه بيتهم
حياك يامضيعه ونوّرتي المدونه
لا بالعكس حلوه هالخطوة منهم اللي هي التوعية لكن مثل ماقالت فيّ توعية بلا اسلوب مرفوضة
والحمدلله جت سليمة عندنا .. لكن اجزم فيه كثيرين ارتفع عليهم الضغط والسكر وتبهذلوا بسبة هالرسالة
عبدالمجيد
الله يسلمك من كل شر
وعز الله انه جابها صح هالرسام
حياكْ ياغالي
28 أبريل 2008 في الساعة 11:31 ص
طويلان
الله يكفيناه بما يشاء 
هههههه ايه ابشرك سويت شي زين .. عقبالك ههههه بس مهوب على مصيبة تسويه على خير وبر وإحسان ان شاء الله
وخويك يابرده والله ..! لهالدرجة البلوت ادمان
حياكْ يابعدي والشكر لك والله على وجودك دايمن
ملامح مصوّر
ياهلا بـ رائد .. نوّرت يالغالي
الله يسلمك من كل شر
وبالضبط اللي صار انهم يبون يكحلونها وأعموها !
حياكْ يا رائد
28 أبريل 2008 في الساعة 12:04 م
ابراهيم
هههههه والله لاتستبعد ان هاللي صاغ الرسالة حَبْ يستظرف مع الشعب السعودي الكريم وارسل هالرسالة السقيمة
شفت الموضوع وضحكت على حالنا كـ العاده
حياكْ يابعدي ومنوّرنا يابو مطلق
أبو مروان
هلافيك أبو مروان
وياليته هالرسائل اللي تكون فيها اخطاء فادحة مثل هالرسالة يتبعها اعتذار من المسؤولين ، لا بالعكس أتبعوها بتبرير يرفع الضغط
الله يرحم الحال بس !
شاكر وجودك يابو مروان : )
28 أبريل 2008 في الساعة 5:20 م
الحمدلله ع السلاااااااااااااااامه
الله يرجك حتى بداية مقالك تروع
بس اشوا عدت سليمه
عليهم اسلوب بايخ .. يسمعون بـ التشويق والاثارة من جددد
يعطيك الف عافيه يابعدي
29 أبريل 2008 في الساعة 1:00 ص
هذا فايدة انه الانسان ينقل لموباايلي ..
ريح بالك من هالخبول مع موبايلي
29 أبريل 2008 في الساعة 9:33 ص
نجلاء
ليتهم طينوها واعتذروا عن هالخطأ
اللي قاهرني حتى اعادة ارسال رسالة اعتذار ما ارسلوا ، يعني حتى اللي جتهم حالات اغماء ودخلوا المستشفى بسبة هالرسالة ماعبروهم برسالة !
شاكر لك وجودك نجلاء
فـيّ
لا حول ولاقوة الا بالله ، يعني صادف وقت الرسالة مع كلامكم عن قريبكم المصاب ! الله يقومه بالسلامه ويلبسه لباس الصحة والعافيه والحمدلله ان والدتك ماسكه نفسها وقرتها زين وفهمت المقصود .. لو امي مكان امك كان صار شي مايسر صديق : D
والتوعية بلا شك مطلوبة وضرورية كل حين لكن مثل ماتفصلتي يكون فيها اسلوب حَسَنْ
شاكر لك وجودك يا فـيّ
29 أبريل 2008 في الساعة 9:40 ص
أسماء
هههه والله شي مضحك هاللي يسوونه .. يعني الاتصالات يبونها تصحح رسايلهم .. مو أنتم من الاساس اكتبوا رسايل زي الاوادم ولا تحملون غيركم خطأكم !
ممكن تتحمل الاتصالات جزء من هالخطأ لإنها مررت هالرسالة لجوالات المشتركين والمفروض يكون فيه تدقيق على الرسايل المرسلة وصيغتها لكن مايحملون كامل الخطأ
الله يصلح الحال بس !
ألف شكر اسماء على وجودك
يوسف
الله يسلمك من كل شر يابعدي
ويارجال ليس من قرأ كمن سمع : D لوّك مكاني وعايش هالمشهد كان حسيت بالروعة صدق ! لكن الحمدلله انها جت على كذا ولا صار شي أعظم
والظاهر هاللي كاتب الرسالة توّه قاضي من فلم اكشن ومهنّق على التشويق والاثارة
الله يعافيك يا الغالي .. وألف شكر على هالطله
لاعدمتك يارب
هذيان
والله الظاهر ان موعد التحويل قرب وبنرتاح من هالخبول على قولتك : )
ألف شكر يا ست
30 أبريل 2008 في الساعة 2:54 ص
اشوا ان جوالي موبايلي ولا وصلنا شي من الرسايل هذي
30 أبريل 2008 في الساعة 5:47 م
كان من الافضل ان يتصلو بكم عوض الرسالة
30 أبريل 2008 في الساعة 6:33 م
الحمد لله على السلامة
3 مايو 2008 في الساعة 1:37 ص
انا أول ما جتني وقف قلبي للحظات
!
بس عادي , حنا شعب ” دفش ” .. انت ما تذكر الكاميرا الخفيه حقتنا
؟!
3 مايو 2008 في الساعة 7:49 ص
يا أخوي أنا قايم أصلي الفجر ولقيت الرسالة بالجوال
وكنت احسب الوالد فيه شي
وجلست يمكن ربع ساعه منب مستوعب الوضع ومبتلش من أدق عليه من أكلم
لكن الحمد لله جت على خير
3 مايو 2008 في الساعة 9:44 ص
اتوقع مابقى احد ما انجلط منها
ابوي ارتاع لان اخوي كان رايح يسبح
وخالي ولده توه متعلم السواقه 
الحمد لله انك موجود ولا كان علوم
قال توعيه قال
3 مايو 2008 في الساعة 7:28 م
والله ياهم يسمعـــون بـ الاسلــوب … الله يكفينـا شرهم
،،، المشكلة انهم ارسلــوا الرسايل بـ آخر الليل ،، وارسلــوا 5 أو 6 رسايل مع بعض
ويـوم خميس بعد !!
يعني أهلك موزعين على الرياض كلها ،، ما تدري من اللي عنده حاله طارئه
وآخر الرساله طلعت الدعوه سبهلله …..
كل ما قلت تطورنا .. اكتشف اننا ما بدينا
3 مايو 2008 في الساعة 8:49 م
حمدلله عدّت على خير
.. نفس الحاله صارت مع
والله ياعليهم أسلوب مدري كيف
قريب لي هو مدير مستشفى وولده دكتور
شوويه عليه كلمة ارتاع وبرضو ولده والسكرتير حقه ماكانو يردون على جوالاتهم
زيادة رعب يعني ,
الله يعين ويعدل حملتهم على خير
قواك الله
8 مايو 2008 في الساعة 4:10 ص
..
يسمعون بالتطور الحين : /
من متى صارو يسوون هالحركات
مـآقلنا لكم لا تسوون شي بس باسلوب يـآخـي
جد تخلف
20 مايو 2008 في الساعة 7:30 م
استغفر الله ياربي
ضحكت ضحك !
ياربي حتى لمن يبون يتطورون يتطورون غلط
ياعمري يا ابوك والله اني رحمته!
22 مايو 2008 في الساعة 9:28 م
الشرهة مهيب على اللي صاغ الرسالة, الرجال ماله ذنب كان ربي خلقة أرفل.
الشرهة على شركة الإنفصالات (لا بارك الله فيها) اللي تنشر أرقامنا وتحطها في يد كل سفيه
لو إننا في بلد متحضر كان قاضيناهم على إنتهاك خصوصيتنا بنشر أرقامنا وبيعها لشركات الإعلانات ولغيرهم.
وصلتني الرسالة وأنا نايم, وأقرا الكلام وأنا ما أدري أنا بحلم أو علم, وماكنت واعي وأميز كل الكلام المكتوب, ماغير كلمة “عزيز لك مدري وش صار فيه” هي اللي لازقة بمخي
ما أقول غير حسبي الله عليهم.
21 يونيو 2008 في الساعة 11:51 ص
كثير من الرسائل الإعانية واللوحات الدعائية ولافتات المحلات التجارية تحتاج لصياغة أفضل
الدعاية والإعلان عمل إحترافي لايتقنه الجميع