الشحن
السلام عليكم ورحمة الله
مساءكم خيرات
بحكم أني أجّلت البعثة الدراسية لفترة طويلة شوي رجعت للرياض وبطبيعة الحال كأي انسان رايح يدرس بيصير معه عفش وبما أن المدة طويلة شحنت اغراضي معي وهنا موضوع التدوينة
قدّر الله علي و شحنت اغراضي من ملابس وكتب واغراض عزيزي يزيد بعد عن طريق شركة شحن ووصلت في الموعد المحدد وبدأت المعاناة مع الشحن السعودي في المطار ولا يهونون الجمارك
جاني اتصال منهم : الأخ عبدالرحمن ؟ قلت : اي نعم ، قال معك الشحن من مطار الملك خالد .. العفش تبعك وصل وتقدر تجي تستلمه ، قلت : يعطيك العافيه ، متى تقفلون ؟ قال دوامنا ٢٤ ساعة ، قلت كم ؟ قال ٢٤ ساعة تعال اي وقت واستلم اغراضك.
هذا كان نص المحادثة بيني وبين موظف الشحن .. وقلت بما أنه دوامهم ٢٤ ساعه بأطلع لهم متأخر احسن عشان افتك من زحمات وغيره .. وطلعت لهم الساعه عشر بالليل .. بعد ما وصلت لهم في مكانهم اللي في قلعة ودر واخذت الابلكيشن تبع الشحن وخلصت اجراءاته اللي خذت من الوقت تقريبا ٢٥ دقيقة نزلت لمستودع الشحن ورحت لمكتب في طرف المستودع على اساس استلم شحنتي وامشي تفاجأت برد الموظف يقول لي هذي لازم يشوفها المدير المناوب واستغربت قلت ليه ؟ تفتيش يعني ولا مشتبه فيني 
قال لا بس الوقت هذا نسلّم الشحنات القابله للاتلاف ، قلت وشلون يعني ؟ قال شحنتك خاصه صح ؟ قلت ايه كلها اغراض شخصية ! قال ايه عشان كذا لازم يوافق المدير لان الاغراض الشخصية نسلمها وقت الدوام من الساعه ثمان للساعه ثنتين الظهر ! قلت تستهبلون علي انتم ؟ الموظف مكلمني وقايل لي ٢٤ ساعه وسألته مره ثانيه وقال تعال اي وقت واستلم شحنتك والاخ هذا ما اتصل الا والشحنه وعدد القطع كلها واضحه قدامه ، ليه ما قال لي من الاول ولا يعنّيني هالمشوار ! قال حنّا الجمارك واللي كلمك الشحن و الشحن دوامهم ٢٤ ساعه وحنا دوام رسمي لا تحمّلنا خطأ غيرنا ، بعدها قال لي انتظر المدير وكلمه ، قلت يعني فيه امكانية انها تطلع اغراضي الحين ؟ قال ايه ، قلت يعني لازم نترجّا ونتوسّل وهو ممكن انها تطلع بدون هالاسلوب السقيم اللي ينبسطون عليه ! عطاني ابتسامه وقال انتظره وان شاء الله بيوافق
انتظرته تقريبا ربع ساعه لمّا جاء ، ولما وصل بدأت معه بكلمات التوسل والتلطّف ثم رجيته طال عمره انه يسمح لي استلم اغراضي وهي كلها اغراض بسيطه..الخ قال لي تعال وقت الدوام الرسمي ، قلت سلمك الله يوم يدق موظفكم قال لي دوامنا ٢٤ ساعه وانا جيت على اساس كلامه لي ، قال ايه هذا خطأ دايم يرتكبونه الشحن ويحرجوننا ، قلت دايم ؟ قال ايه كثير يصير هالشي وقلت للحين بحكم ادارتك للجمارك ماستوعبت انهم يرتكبون خطأ ويعطلون الناس ويتعبونهم على الفاضي ولانبهتهم ان الموظف بعد مايبلغ بوصول الشحنه يقول آخر شي ترى وقت الدوام من ثمان لثنتين ؟ وكن كلامي زعّله وعطاني نظره وقال لي تعال وقت الدوام الرسمي الحين منيب معطيك شي ( لاحظوا معطيك ) مع ان الاغراض خاصه فيني ما يملك فيها ولا حتى شطرطون ملزّق فيه الكرتون
تحيسبت وطلعت وجيتهم من بكرا في وقت الدوام الرسمي
اول مادخلت كان فيه مكتب امن ناداني واخذ بطاقتي ورقم جوالي وعطاني بدل بطاقة الاحوال بطاقة مراجع .. احتياطات امنيه الله يجزاهم خير مايقصرووووون .. دخلت ورحت للمستودع على طول بحكم اني انتهيت من الشحن ولما وصلت الشحن وبين زحمة الناس وزحمة الاغراض وحوستها والصراخ والهواش وصلت المكتب وعطيته الورقة من الشحن تفيد بأنه لي اغراض عندهم .. سألني من وين واصله واسمي ورقم جوالي مع انها كلها مكتوبه قدامه ! عطيته اللي يبي من معلومات ومعها الرخصة بحكم ان بطاقتي مع الامن .. ختم على الورقه ووقع وبعدها قال رح للمخزن هذا ويأشر عليه .. ورحت له وجابوا لي الاغراض بعدها قال لي عامل الشحن روح جيب موظف .. قلت هاه ؟ قال جيب موظف عشان يسوي تفتيش قلت : من وين اجيب موظف ؟ وانا اضحك من قل الحيله قسم بالله تعب نفسي ورفعة ضغط ! ويأشر لي على المكتب اللي كنت عنده . رجعت للمكتب قلت عندكم موظف يجي يفتش اغراضي عشان امشي ؟ ثلاثه كل واحد قعد يناظر الثاني وكني بكل واحد فيهم يقول عسى خويي يقوم وبالصدفه مر موظف رابع من وراي وكلهم بصوت واحد يأشرون عليه يقولون هذا هذا اسمه فلان .. ناديته قال سم ؟ قلت ممكن تفتش اغراضي ؟ قال وينها ؟ قلت شفها ذيك .. انا ابي افهم يوم قال وينها وش يحس فيه ؟ يعني اغراضي في بيتنا ابيه يخاويني للبيت يفتشها ولا وش الموضوع !
مشى معي للاغراض وفتشها وبعد ماخلص قلت هاه اقرب السياره ؟ قال لا رح جب لي رقم المستورد .. قلت من وين ؟ قال من الشحن .. قلت والشحن ليه ماحطوه من قبل يوم يخلصون اوراقي ؟ قال خطأهم هذا .. عاد تخيلوا ملامح وجهي وقتها :5: رجعت للشحن ( وللتنبيه المسافه بين الشحن والمستودع مسافه طويله ) وصلت للشحن وكان قدامي رجال اردني ومعه ولده ، الشحنة حسب مافهمت جايه بإسم الولد ، والولد معه بطاقة هوية أردنيه ولابعد طلّع اقامه ، وكانوا يبون رقم المستورد نفس حالتي .. قال لهم الموظف ابي اقامة الولد ، قال له يا ابني الولد ما معه اقامه توّ واصل السعودية وبنستخرج له اقامه ، كان مضاف من قبل في اقامتي يوم كان صغير لكن معه بطاقة الهويه وفيها بياناته وصورته ! قال لا ابي الاقامه ، قال ياعمي الولد ما معه والله مامعه ، قال لازم الاقامه ! الاردني سكت قال يعني شلون ترجعونها ونرسلها مره ثانيه باسمي ؟ قال اممم خلاص عطني الجواز ، قال ما احد قال لي جيب الجواز ! قالوا لي بطاقة الهوية وصاحب الشحنه وبس .. قال اممم طيب اوك زين عطني بطاقة الهويه .. طيب يا منيب قايل مدامه من الاول بتقدر تخلصها ببطاقة الهويه تماطل فيه كذا لييييييييييييه !!!!!!!!
خلص منه وجاء دوري عطيته الاوراق قلت ابي رقم المستورد لاهنت ، قال عطني بطاقتك وعطيته الرخصه بحكم ان بطاقتي مع الامن ، رجعها قال لا ابي البطاقة .. قلت شكلك تنبسط على ان الواحد يترجاك !؟ ودك نكرر السيناريو اللي صار مع الاردني تو ؟ ضحك بكل بلاهه وقال لا لاني ابي تاريخ اصدار وانتهاء بطاقتك ، قلت ويومك تبي البطاقة بشكل ضروري كذا ليه ياخذها مني الامن تحت ؟ قال مالنا دخل فيهم الامن .. قلت تستهبلووووووون علي انتم ؟؟؟ امس ممشوريني بسبب خطأ واحد عندكم .. الا وينهم اللي يدقون يبلغون بوصول الشحنات ؟ قال مدري ! 
قلت ليه طيب ماتبلغ الامن تراكم بمكان واحد وبينكم سنترال ياخي قل لا عاد تاخذ بطاقات خذ رخص قياده ولا حطوا له آلة تصوير ويصور البطاقه ويرجعها ! قال انا موظف هنا قلت اشوى مير علمتني انك موظف احسبك جاي مسير عليهم!
اخذت رخصتي ورجعت للامن ( مع العلم ان المسافة بين مكتب الشحن وبين الامن مسافه طويله ) ويوم وصلت له حطيت رخصتي على طاولته وقلت عطني بطاقة الهويه وخذ بدالها رخصتي لان الموظف فوق يبي الهويه ضروري وعشان كذا الله يرضى عليك لا عاد تاخذ بطاقات المراجعين خذ الرخص حقتهم لانهم مهوب خالصين الا ببطاقاتهم قال لا خلاص خذ بطاقتك ورخصتك سجلت رقم البطاقه ورقم جوالك.. وقفت في وجهه قلت وبس ؟ يومك ما تحتاج الا رقم الهوية ورقم جوالي واسمي ليه يوم سجلتها مارجعت لي بطاقتي ؟ قال اممم وقام يحك راسه قال اجراءات امنيه ؟ قلت اها اجراءات اجل يعني بأطعن الموظفين ببطاقتي ولا باسوي بها عملية ارهابية ؟ .. رجعت لخوينا راعي المستورد وعطيته الورقه وبطاقة الاحوال وعطاني الرقم ورجعت للشحن .. اغراضي منطّله كأنها اغراض اللي يتسدحون في التوسعه في رمضان وأدوّر الموظف خوينا مالقيته .. رجعت للمكتب اللي قالوا لي خله يفتش اغراضك وقلت كان فيه موظف فتش اغراضي وقال لي يبي رقم المستورد وقال رح جبه وتعال لي هنا .. ما قال لي تعال دورني في هالمستودع ! قالوا وش اسمه؟ قلت وش دراني وش اسمه ؟ قالوا عشان ندوره معك .. قلت يا جماعه تشتغلون انتم ولا تطقطقون علينا وتنبسطون ؟ قسم بالله وضعكم مزري وش هالترتيب والتنظيم عندكم ؟ لو الاغراض هذي مافيها اغراض لواحد من اخوياي ولاّ كان تركتها ! حامت كبدي قسم بالله من هالشغل.. قام شويّب وقال انا باخلصها لك عطني ورقتك عطيته الورقه وراح معي للاغراض ووقف عندها ثم نادى له موظف ثاني وجاء وقال خلص هذي .. تتوقعون وش سوا ؟ قرى عدد القطع في الورقه ثم عد القطع الموجوده قدامه ويوم صارت متطابقه شخط شخطتين على الورقه .. قلت هاه خلصنا ؟ قال لا رح الحين لمكتب الامن عشان يعطيك ورقة استلام شحنه .. رحت لمكتب الامن ومسافه كانت قصيره مقارنة بالمسافة بين الشحن والجمارك عطاني الورقة ورحت اقرب السياره عند باب الشحن.. وصلت عندهم وعطيتهم الورقه ونادوا اثنين بنقالية وشالوا اغراضي وحطوها في السياره .. وتوني راكب و محرّك الا ويلحقني بنقالي ويخبط قزازة السياره توقعت اني نسيت شي وقفت وفتحت القزازه قلت هاه ؟ قال ابغى فلوس قلت مافيه .. قال انا شيل ! قلت يعطونك راتب ؟ قال ايوا قلت عشان انت تشيل اغراض يعطونك راتب ؟ قال ايوا بس انا ابغى انتا يعطيني اجر ههههه اعطيه اجر الله يصلحه .. قلت انقلع صديق تراها حايمه كبدي .. نطل كلمتين بنقاليه جعله العله وواضح انها كانت سبّه بس في قريح مهوب اردى من اللي اعلى منه في هالمكان البئيس
وابشركم مير خلصت
طبعاً هالفلم بدأ معي من الساعه ١٢ الا ربع صباحاً وانتهيت طالع من الشحن الساعه ٢ وثلث
الشحن الجوي السعودي شعارهم الحقيقي ” نجعلك تَعَافْ اغراضك ”
مشاكل كثير ادارية وضحت لي في زيارة وحده للشحن ولا ودي ألخصها كـ نقاط لإن اللي بيقرا ماحصل لي بتوضح له بشكل جليّ ، والمشكلة في أغلب الدوائر الحكومية عندنا ان الموظف يستخدم الكرسي اللي هو عليه كـ كرسي سُلْطة مو كرسي خدمة ولاستوعب انه يستلم مرتب آخر الشهر نظير الخدمه والتسهيلات اللي يجدر به انه يقدمها لكن اللي نشوفه ونسمعه ان الغالب يستخدمه عشان يتفرعن ، وهذا اللي مخلي الواسطة هي الحل الوحيد حتى الحين قبل ما ابدأ اي معاملة في اي ادارة حكومية لازم قبلها اتصل على فلان وعلاّن اذا يعرف احد في هالدائرة اروح له ويخلصني او لا . والعذر اللي اقبح من ذنب اذا عرّيت الموظف انه مقصّر وماخدمك بشكل مطلوب تعذّر بأن المرتب اللي يستلمه مايكفي مايقدم طال عمره ” وهذا عذر موظف سابق في وحده من الدوائر الحكومية قاله خلال نقاش ودّي ” فإذا انت تشوف المرتب مو كافي ومتسبب هالشي في تعطيل المراجعين ياخي قم عنه وخل غيرك اللي يشوفه مرتب كافي يجلس عليه ويخلص المراجعين !
بعد هالزيارة عرفت سبب اصابة الكثير من المعقبين بالصلع وامراض الضغط والسكر
* اللي بيروح يستلم اغراض .. ياخذ معه بطاقة الاحوال والرخصه وصورتين من بطاقة الاحوال او ثلاث .. وياخذ رقم المستورد اذا وصل الشحن من البداية .. ويروّق كثييييييييير قبل مايروح
ترى التدوينة طويلة منتاب فاضي لاتقرا <= بينطق
سلام عليكم
9 نوفمبر 2009 في الساعة 1:06 ص
hard luck
9 نوفمبر 2009 في الساعة 2:33 ص
الحمدلله خلصت
ياخي جد وضعنا مزري ماادري. ليه بالذات الشي وزاره مدرسه.مستشفى الخ اهم شي حكومي مو فاهمين انهم وضفو لخدمتنا لابارك الله فيهم
مااحب الشحن ولا المطار بكبره قلة ادب وقسم اذكر امي مره الا تبي تاخذ عربيتها ماتبي عربيتهم مدري هي بازه بها ياحبيلها انها جديده سفابها بس الشحن وضيعوها اشك انهم خذوها ناقصهم يمكن حسبي الله ونعم الوكيل
وراجعونا راح لهم اخوي مره وهبلوه يقول قمت اساعدهم مدري وش قصده كثير مايخافون الله
مير امي شقت ورقتهم وقالت دفعت بلاء حلالهم
مدري ليه تجي في بالي شنطتي الي كسروها نعنبوو بليس مايخافون الله اذا وزنو الشنطه وبيودنها تنشحن وكذا انواع التجديع :@
تراها بفلوس ياعيال الشسمه تسلاب قهروني مير صرت مااروح الا بها ويناظرني ذاك اليوم الي يستلم العفش بغيت اقول هذا عمايلكم والله مااغيرها الا اذا طلعت عن الخددمه حسوفه شناط فيكم قدر تكسرون وبس
وغيرتها طبعا مغصوبه اختي تقول وخري عنا انتي وشنطتك تفشل
وافكرر اشتري لي شنطه اهلا وسهلا ورحله سعيده ارخص ولا فيه امل تتكسر هههههههههه
ياكثري احسني سولف واجد :$
9 نوفمبر 2009 في الساعة 3:57 م
طهور إن شاء الله
وإقامة / عودة سعيدة ياعبدالرحمن
10 نوفمبر 2009 في الساعة 3:05 م
الحمدلله على السلامة
!!
..
كان المشاوير طول موضوعك فالله يعظم أجرك ياخوي
بس استمتعت وأنا أقرا ..
!
أهم شي آخر الحلقة .. العامل كان خاتمة جيدة
10 نوفمبر 2009 في الساعة 3:19 م
صراحة كنت بقراها قبل اروح للإختبار بس يوم شفتها أطول من الملزمة الي معي وقاعدتن أحفظ فيها من الصبح قلت معصي … والله ان تتفرمت المعلومات الي براسي من هالتدوينة
:
:
الشحن الجوي السعودي شعارهم الحقيقي ” نجعلك تَعَافْ اغراضك ”
يا أنا مت ضحك هنا ..
لازم المرمطة يا عبدالرحمن ولا ما يطلع الشي سعودي .. تبينا نترك عاداتنا وتقاليدنا ونشتغل صح .. مايصحش أبداً
10 نوفمبر 2009 في الساعة 4:27 م
قسم بالله حامت كبدي وانا اقرأ ,, كان الله في عونك ,, كان ارسلتها بأي شكة شحن ثانيه وافتكيت من ذا القلق ويوصلونها لك للبيت بعد ولا كل هالمشوره
11 نوفمبر 2009 في الساعة 3:41 ص
الله يكون في عونكم
…
13 نوفمبر 2009 في الساعة 4:31 م
.
هي وقفت على الشحن ولا على الجمارك ؟
الديره بكبرها فوضى وتحتاج اعادة تنضيد
14 نوفمبر 2009 في الساعة 8:38 م
الله يصلحهم بس!!
من جد شي يطقق!! يعني لو إننا ببلد أوروبي مستحيـل نلاقي هالأشكال عندنا ..
وحتى ولو صار و شذ عن القاعدة عندهم موظف فـ بتلاقيهم كلهم يحاولون يصلحون الأخطاء اللي تطلع من أي موظف !!
/
شكــــرا أخي على شرح معاناة المواطنين
الله يصلح أحوالنا
16 نوفمبر 2009 في الساعة 12:21 ص
عبود:
تسلم
- – -
حايمتن تسبدها :
من ناحية التجديع فهيّن قسم بالله ان البنقالية هناك يعاملون الشناط معاملة اكياس زبالة من طريقة شيلهم لها وحطها
ههههههههههه جازت لي شنطة اهلا وسهلا .. طلع غبار يوم قريتها
ابرك الساعات يا حايمتن نسبدها . وأبد ماهنا الا مدونتك سولفي بيديك ورجليك
- – -
توّاق :
يسعد قلبك عزيزي
تسلم
- – -
نوف :
الله يسلمك
وأبد غلطه مهيب متكرره ان شاء الله ، بأصير اشحن دور تو دور .. لو بزود ألف ريال مهيب مشكله ولا مرمطتهم
وعسى دوم المتعه
- – -
نورة:
وبأدعم حملة برطنة التعامل بكل ما أوتيت من قوة
ههههههههههههه حسبي الله على العدو تفشلت والله
وش اللي اطول من الملزمه خافي الله يا بتتتتتتتتت
وعسى ضحكتك دوم ، ومن جد اللمسه السعودية ظاهره جداً جداً .. بعد سعودة الوظائف بيشتغلون على برطنة التعامل
حيّاك
- – -
بنت ابوها:
انا اول مره اجرب الشحن .. خلاص توبة
مثل ماقلتي باصير اشحن بهالطريقة افضل بكثير واريح
هلا فيك
- – -
مشاعر:
الله يكون في عون الجميع
شكراً
- – -
نبض المشاعر:
حركات سعد السفيه ماحبها ترى ههههههههههه
حياك
- – -
الرزينة:
ايه صدقتي ، هناك حسن معاملة الاغلب تغطي عيوب القلّة منهم وهنا صاير العكس .. بيعين الله يابنت الحلال بيعين الله
الشكر لك على زيارتك وياهلا بك
18 نوفمبر 2009 في الساعة 1:48 ص
ههههههههههههههههههههههههههههه
هههههههههههههههههههههههههههههههههه
الله يوسع صدرك بالعافية في تالي هالليول
19 نوفمبر 2009 في الساعة 1:12 ص
هذا حال الدوائر الحكومية
شي يقرف ويكرهك بحياتك لحظتها
المرمطة هذي لازم تصير وخصوصاً بين أروقة الجامعة
يمر الواحد على عشر طعشر موظفة وبالأخير حلّك يصير عند اللي بديت من عندها ليش المرمطة مدري
!
أنا أحسني هـ السنة ماش ماعاد أتحمل ممكن أخورها أي لحظة
يعني المفروض تيسرون أمورنا ما تعسرونها 
يعني أحسني إذا مرمطوني ولا قالوا لي شي بتفلت وأقول ترى لولا الطالبات لما أنشئت الجامعة ، وكانتس اللحين متوهقة وماتوظفتي
/
< ومير تخربها 
الحمدلله على سلامتك
وزين سوو فيك الشحن ولا كان ماشفناك
20 نوفمبر 2009 في الساعة 1:14 ص
كله كوم و ( من الساعه ١٢ الا ربع صباحاً ) كوم ثانيَ
اجلَ 12 الصباح ..!!؟
و 9 وشي ..!!؟ شكلها الفجرَ عندك
لووووووووول
تعيش وتاكل مرمطهَ غيرهاّ ~ ومبروكَ وصول الشحنهَ
21 نوفمبر 2009 في الساعة 5:32 م
لينا :
عساها دوم الضحكه
وآمين واياك ومن يقرا
- – -
شغف:
هذي المشكلة دايم يصير للمعامله روتين سقيم ، يوم كنت بأسحب ملفي من الجامعة كانت معاناة وكان بإمكانهم جمع البيانات كلها عني في الحاسب .. يطق برنت ويعرف انا مستعير كتاب ولا السكن يبون مني فلوس ولا علي مخالفات ولا طاعون يطعن العدو
مير الله يعين ويسهل
- – -
طفله تحت المطر :
هههههههههههههههههههههههههههه حلوه الفجر
بس صح علي .. يعني ١١:٤٥ ما زلنا قبل الظهر يعني صباحاً
حياك
21 نوفمبر 2009 في الساعة 11:28 م
هههههههههههههههه اهم شيء اسم الشعار الجديد حقهم ..
ناس ماتقدّر بالعربي ، لو كل واحد حط نفسه مكان غيره ماكان صار هذا كله ..
الحمد لله ان العفش وصل بسلام
..
22 نوفمبر 2009 في الساعة 10:55 ص
يعني بصراحة انا مادري من متى ما ضحكت بها الطريقة، خصوصاً انك تشرح وشكلك يعني طفران من خاطر ولكن تحاول تلطف الجو بالابتسامات والـ(قفشات) .. صراحة ضحكت من قلب ..تذكرت معاناتنا مع (اتصلات) حسبي الله عليهم -_- .. المشكلة اني فالدوام! .. حاولت اني اكون رسمية وشكل رسمي وانا اقرا المقال بس ما قدرت …
الله يعطيك العافية وحمدلله على السلامة ..
خذ فيهم اجر وسولهم بورسس جارت
.. لصقه على الباب للمراجعين لول
22 نوفمبر 2009 في الساعة 5:41 م
وي وي سلامات وراك اجلت
<~ فيس عوره قلبه 
ياجعلك تعرس بـ هالساعة قول اميين
صراحة مأسآآه مع هالشحن و الشحططة انا عورني قلبي وانا اقرأ
يقطع بليسهم يموتون اذا ماشحططوا الواحد
وش بضرهم لو وصلّوا الشحن والاشياءات لكل واحد بيته مراح يضرهم شي
اي شي حكومي تبن
معآآدلة تآآمة للأبد 
يالله الله يفتح ع قلبك ويعرسك وييسر لك امرك كلّه ويسعدك وين ماتكون ويوفقك بدراستك ويسهل عليك الغربة فيها
وعؤبآآل مانشوفك دختوور أد العآلم
موفق بو بندر
23 نوفمبر 2009 في الساعة 1:35 م
يقلع أبو الحالة الي كذا
..
أنقهرت وانا بمكاني
23 نوفمبر 2009 في الساعة 7:08 م
والله أحس أنت قديييييم حتى مليت دايم أدخل المدونه وأشوف تدوينه العيد
بعدين تو قلت خلن أسيّر أثري مبطيه و متأخره .. انقهرت
عمومن سيدي حنا عندنا قيّم ناقصه .. مبدأ الإتقان هذا قليل يطبقونه ..
من القصه اللي انت عشتها و كثير عاشوها نستنتج
أن ما فيه تواصل بين الإدارات مع أن بينهم ترابط بالشغل قووووي ومستمر .. !
ومثل ما قلت كثير يستخدمون كرسيهم كـ سلطه !
زي واحد أعرفه داق على واحد بسفارة الفلبين يمشي خدامته ..
ما أحب سالفة الواسطة ومدري وشو
مع أن دايم أصلاً كل حياتنا كذا بس ما أحب !
نقدر نقول ؛
عندنا خطأ كبير بحياتنا العمليه .
يعني عموماً …
حنا مو ع اللي مفترض أننا نكون ،
ويعني مثل ما قالت نبض المشاعر فيه فوضى كبيره!
و أتمنى أننا نعيش وعي ونقضي عليها .
أما أسلوبك صدق معبّر
حمدلله ع السلامه أهم شي [:
26 نوفمبر 2009 في الساعة 4:31 ص
ههههههه ايوالله طويله التدوينه
بس ماحسيت والله الا لما قلت انت
مرره استمتعت بالقراءه
هنَاك العقلان
ويعطيك العافيه
26 نوفمبر 2009 في الساعة 7:30 م
emoo :
هلابك ايمان .. ودوم الضحكه
الله يسلمك من الشر وشاكر لك حضورك
- – -
lil.D :
الله يعافيك ويسلمك من الشر .. وعسى تدوم لك الضحكة يارب
سعيد بردك وحياك الله
- – -
h AL-DosSaRy :
الله يسلمك من الشر .. شوية ظروف ومافيه الا كل خير الحمدلله
وآميييييين يارب ومن يقرا من العزابية
الله يسعد قلبك على هالدعاء .. الله يتقبله يارب .. لو مايجيني من هالبوست الا دعاويك كفتني
الله يوفق الجميع وشاكر لك كثير هالرد
- – -
لمى :
حاله وعدت جعلها ماتصير الا لعدو
حياك ربي
- – -
ركااد :
لاتنقهرين ما فات الا الشر ان شاء الله
وصدقتي .. المشكله اغلب المعاملات الحكومية لازم تتدخل فيها واسطه واذا ماتدخلت الواسطه لازم الواحد يتميلح على الموظف ويذل عمره بكلمتين ثلاث ولا يدف في يده مبلغ وقدره .. اييييه الله يصلح الحال بس
شرفتي وآنستي .. والله يسلمك من الشر
- – -
روان :
هههههههههههههه
هلابك روان
الله يعافيك من الشر وهنآك خير
3 ديسمبر 2009 في الساعة 6:49 م
والله إرتفع ضغطي هذا وأنا متربعه بمكاني عاد شلون معك ><
يعطيك العافية (=
7 ديسمبر 2009 في الساعة 4:12 م
أوووووووخ
يا كبدي أنفجرت من الضحك
يا حبي للهجة الشرقيه !! أجل ( حامت كبدك ) ؟
تحياتي الحااارة
9 ديسمبر 2009 في الساعة 12:43 م
لا تعليييييييق
11 ديسمبر 2009 في الساعة 12:28 م
تحياتي ,,, ننتضر القادم انشاء الله احلى مع مرمطة جديدة هههههههههههه
18 ديسمبر 2009 في الساعة 2:51 ص
بصراااحه موضوعك جدا شيق دخلت معك وسالفتك جو لدرجة إني تعبت معك من كثر المشاوير اللي مشوروك بها الله ينعنهم
أنا مره أخروني بسبب شحن شنيطه صغيره عن رحلتي وطارة الطياره ياعساهم العله وأنا كنت واصله المطار قبل الرحله بساعه كامله بس بسبب بطء عمل اللي على الكاونتر وسخفه الأهبل تأخرت بس ماتشوف وش سويت به لعنت سلسقفين جدوده المتخلف وخذيت حقي بإني عكرت مزااااجه ونكدت عليه ومسخرته قدام العالم عشان يعرف إن الله حق
31 ديسمبر 2009 في الساعة 1:15 ص
دحمنى … الحمد على السلااامه
عاد أم الحوواطه اللي عندي قايله لك برساله خاصه تروح وتجي بالسلامه وربي يوفقك
أقص يدي بتمووت ضحك يوم تشوفها
نورني بززياره لمنتداي الخاص
بنفس نكك <<< تلاحظ طرار ويتشرط
تواقه لوجودك ومتابعه لك
4 يناير 2010 في الساعة 11:21 م
:
هذا جزاء لنا
عشان من اليوم ورايح كل واحد لا بغى يشحن شي
يسافر بالشي بنفسه يحطه ويرجع ديرته <
وضعك كان مزري والله
الحمد لله عدت
1 فبراير 2010 في الساعة 3:19 ص
ههههههههههههههههههههههههههه
الحمد لله على السلامه طالعن من الشر مدونتك مسيله ممله من كثر المشاوير فقط
بس هاذا وضعنا بكل الدوائر الحكوميه مو بس الشحن المشكله ان الموظف تكلمه ونفسه خايسه وتتشحذه ساعه وكلن معتبر نفسه شيخ بس احسن شي البنغالي
مااقول الا الله يصلح الحـــــــــــــــال
7 فبراير 2010 في الساعة 10:46 م
خليني احكليك من مواقع المدونات السعودية الظاهر انه الدوائر الحكومية مش ولابد يعني، بس عنا بالاردن ، جواز السفر بطلع بساعتين (في مصر بثلاث ايام و سمعت بالجزائر بده شهر) و الهوية الاحوال بساعة و شهادة الميلاد بساعة
الله يعنيكم و انا مفكر الخدمات متقدمة عندكم أكثر
22 فبراير 2010 في الساعة 5:50 ص
هههههههههههههههه فكرتني بنفسي
يوم كنت بالجامعه رحت عمادة القبول اغير اسم عمتي في وثيقتها عشان تطابق الجواز
قعدت 3 اسابيع وانا اراجعهم و وكيلة الخريجات شايفه نفسها تكلمني من طرف خشمها وما تطالع فيني ولا ترفع عينها
بعدين تسكت 5 دقايق ولما ارجع اقولها ايه وبعدين تروح تكمل كلامها ,, مدري تبي تطفشني ولا تبيني افقد الامل وماعاد اطلب منها شي هي اصلا توظفت عشان تخدمنا فيه :@
يوم طلعت الوثيقه بالاسم الجديد اخذتها وقعدت على كرسي برا مكتبها وقعدت اصيح :’(
اصيح من القهر احس اني ذليت حالي وانا ابي اخذ حق بسيط من واجبها تخدمنا فيه.. لكن اعترف اني صرت انسانه اقوى بعد التجارب المشابهه (N)
بس وقسم هالاشكال من الموظفين هي خلتنا ناس غير محترمين ونرفع صوتنا ونذب اذا استدعى الامر ذلك
25 فبراير 2010 في الساعة 3:52 ص
اهنيك على الاسلوب يا موسعن صدره .. مع ان قصتك تجيب الهم الا اني اقراها وانا اضحك .. لو غيرك اللي قايلها صفقته من ثاني سطر .. اتمنى لك التوفيق ومشكور على رسم البسمه على شفتاي < انقلععععععععععع
5 مارس 2010 في الساعة 3:49 ص
هههههههههههههههههههههههههههههههههههههههههههههههههههههههههه
وربي مت ضحك وانا اتخيلك
والله كل العرب في تعاملاتهم بكل مكان حاله الله يعيننا
ربي يسعدك يااخوي ^_^
2 أغسطس 2010 في الساعة 5:13 ص
ههههههههههههههههههههههههههههههه
اقصم بالله حسيت نفسي اني قاعده أتفرج على مسلسل طاش ماطاش
الله يكوون بعونك …
ترى الاستهتار ذا موجود بكل مكان موب بس الخطوط الجويه
انا قد صار لي موقف مشابه لموقفك
انا مره من المراير <<< متعوب عليها
نزلت لي اف في ماده من المواد وانا متأكده اني ناجحه لان درجات اعمال السنه كانت كامله
عندي… وتخيل قعدت أراجع استاذه الماده ووكيله القسم وكل وحده تنطلني على الثانيه
وبعد ثلاث اسابيع من المراجعه والمعاناه طلعت ناجحه وب92
والله لا يوفقهم مرسبيني ونزل معدلي بسبت هالشي
وصارت لي مشاكل لا لها اول ولا تالي وفي النهايه
كان السبب غلطه
اللحين عرفت ليش معظم الشعب السعودي معاهم سكري وضغط؟؟!!