مساءكم طاعه و خير ..

حلّ الضيف و وصل .. سعيد جداً بمَقْدِمِهْ واشتياقي له هالسنه غير و فرحي به مختلف عن أي سنه .. كتبت واجد ومسحت كل ماكتبت قلت لا ماعطيته حقه ولابي اكرر ما يقال ..

لكن كلمتين اذكّركم ونفسي بها .. المُلهيات في ازدياد ، والضيف الكريم ايامه قليله .. تخلصوا من كل ما يُلهيكم عن اغتنام الثواني في هذا الشهر ، ابقوا على الضروريات في حياتكم .. اعمروا ايامه وساعاته ودقائقه وثوانيه بما ينفع ، اقبلوا على الطاعات بإجتهاد ، وكفوا جوارحكم عن المعاصي بمجاهدة ، نقّوا قلوبكم وصفوها تمااااماً من كل ضغينه وحقد وحسد وكره لأخٍ لكم او أخت مسلمه ، احتسبوا كل ما تلقونه من مشقه وتعب .. نهار رمضان له لذة وفيه روحانية عجيبة و لحظاته بما فيها من مشقة قليلة الا انها تورث القلب سعادة وراحة وطمأنينة تبقى مابقيت النفس والروح طالبه ومقبله على الطاعات في رمضان وبعده ما يوازيها ولايعدلها شي آخر ، اللي مايعيش نهار رمضان مايستلذ بـ ليله .. رمضان هو أكثر وسيلة مساعده ومعينه على التغيّر للأفضل دينياً ونفسياً وبكل جوانب الحياة ، أعيادنا صارت طفش وملل وغلقه .. العيد اللي مابينه وبين صيام آخر يوم الا ساعات قليلة تغتلق فيه النفس وتضيق ومحد بحث وش السبب ؟ السبب واضح وجلّي .. نهار الشهر نوم وليله مسلسلات وبرامج لاتسمن ولاتغني من جوع ، طبيعي بيكون هالأثر هو الظاهر على النفس اذا كان الروتين فيه مثل اي شهر غيره.. وفي الجانب الآخر شوفوا سعادة كبار السن غالباً وفرحتهم بالعيد ، لإنهم جعل ربي يحفظهم ويطوّل بأعمارهم على طاعته ويمتّعهم بالصحه والعافيه استقبلوا الشهر خير استقبال وانعكس اثره بشكل مباشر ، يبكون ليلة العيد على فراق الشهر بكل ( حزن ) ويضحكون صباح العيد بكل ( فرح ) ، شي يحتاج يتأمله الواحد عشان يعرف وجه القصور عنده وليه الشعور عنده معاكس للي مفترض يكون .. اِستَقْبِلوه كما ينبغي أن يُستقبل هذا الكريم.. وبيكرمكم الكريم سبحانه بكل خير وسعاده وراحة وسعة في الرزق .. لا تكبّرون المخادّ وتتكفنون بالشراشف في نهار الشهر الكريم.. كبّروا بألسنتكم واكثروا من الذكر وتكفنوا بالجلال و افترشوا سجاجيدكم <– البنات طبعاً ( تخيلت سعد متلفع بالجلال ومرتكز في الصاله يطلب الله في القوايل عملاً بما دوّن اخوه ض٣ )

ترى هذي كلمتين الحين ض٣ ! ماقلت لك ياعساف اني ثرثار XD

يارب بلغنا ووالدينا ومن أحببناه فيك وأحبنا فيك شهرك الكريم و أكرمنا و جُد علينا و ارحمنا بمغفرةً تمحو بها كل زللنا ، وعتقاً من نارك يعلو بنا في جنانك يا أكرم الأكرمين ويا أجود الأجودين

تدوينة أنصح بأن تُقرأ : http://domo3.us/blog/?p=802
موقع أنصح بأن يُزار : http://ramadan.ws/

*رغم أنك تصوم منذ قرون، دعه يكون رمضانك الأول. – أحمد خيري العمري

كل عام وانتم بخير أحبابي زوّار المدونة .. وعذراً لكم بحجم محبتي لكم على الانقطاع.

الحمدلله حمداً كثيرا ،
ليتخيل احدكم الموت على هيئة رجل .. يقبل عليه ويضمه ضمّه يبي فيها قبض الروح ، ثم يتركه ويرد له ربي روحه ويجعل الحياة ترجع له ..
هذا الشعور هو اللي عشناه بالضبط عصر يوم السبت الماضي بسبب حادث اصطدام وانقلاب تعرضت له و أنا اسوق سيارتي بأمان الله ومعي اثنين من عيال عمي..

الخطأ كان علي ١٠٠٪ ، وبفضل الله وكرمه طلعنا من الحادث سالمين ومتعافين وما علينا الا شكر الله ، صاحب السيارة الثانيه هو اللي تعوّر شوي الله يشفيه ويعافيه ويقوّمه بالسلامه

الحادث كان في التقاطع ( اللعين ) ، تقاطع طريق الملك فهد مع التحليه .. مستغرب التوقيت بين الاشارات اللي حاطينه ! الاشارات بينها تقريباً ١٠٠ متر ومع ذلك التوقيت بين ايقاف اشارة وفتح الاشاره الثانيه جداً قليل .. اللي أخرني بس السيارة اللي قدامي هدّت شوي عشان يروح يسار ، اقل من ثانيتين كان تأخيري ( مع العلم اني تجاوزت الاشاره صفراء ! ) فتحت الاشاره اللي قدامي على اليمين استعجلت عشان اتجاوزهم وكنت عارف اني اقدر اتجاوزهم لاني اشوف السيارات في الاشاره ويشوفوني جاي ماشي بشكل عادي لكن السايد الايمن في هالاشارة كان صاحب السيارة مستعجل الظاهر ومشى بسيارته بسرعة ولاانتبه لي ولا قدرت اتفاداه .. في غمضة عين صرت انا قدامه وهو على يميني .. صدم فيني وطرت وصدمت في الاشارة اللي كانت على يساري وطيحتها مع اللوحة الدعائية بعدها رجعت للخط اللي كنت ماشي فيه وتقلبت السيارة ‪، والحمدلله على ما جاء من الله‬

بعد ما صار الحادث بتقريباً ساعه .. كان فرد المرور يقول لاخوي ان هالتقاطع دايم تصير فيه حوادث بهالسبب .. ان التوقيت بين الاشارات قليل .. بعد ماخلص كلامه صار حادث بنفس طريقة حادثي بالضبط لكن الحمدلله كانت الاضرار في السيارات واضرار خفيفه ، لكن بنفس الطريقة ! حادثين بينهم ساعه وبسبب نفس المشكلة من الاشارات غير الحوادث اللي صارت على حسب كلام فرد المرور .. مدري يبي لها عالم ذرّة عشان يجي ويزيد التوقيت بين هالاشارات ؟ او وش ينتظرون يكون حجم الحادث عشان يتحركون ويعدلون هالتقاطع يا بزيادة التوقيت بين اغلاق اشارة وفتح الثانية او يحطون رصيف بوسط التقاطع مع اشارات في اطراف الرصيف ! لاني بعد ما صار لي الحادث .. كثيرين من اللي كلموني او واجهتهم يتحمدون لي بالسلامه أول ماعلمهم موقع الحادث يقولون اييييه ياشينه وياكثر مانشوف فيه حوادث !
لاينفهم من كلامي اني اتعذر لنفسي باللي صار لي .. كان خطأي على الرجال ١٠٠٪ لان ماله ذنب .. الاشارة له مفتوحه .. لكن المرور او المواصلات اياً كان المسؤول عن الاشارات وتعديل التوقيت فيها وادارتها كان عليهم نسبة خطأ لي ، وبعد لا ينفهم من كلامي انه اعتراض على قضاء وقدر .. اعوذ بالله من هالشي ، راضي جداً بما كتب الله والحمدلله ما كان اعظم ، لكن ظاهرة ومشكلة متسببة على المسلمين ولها فترة واضرارها بشكل شبه يومي في هالمكان ما تعالجت للآن ليه !؟

الحمدلله على كل حال ، والحمدلله ما كان اعظم .. واحمد الله واشكره اني وعيال عمي طلعنا من هالسياره على ما جاها سالمين ما أصابنا مكروه .. لك الحمد ربي.

همسة: حبايبي اللي يتجمهرون عند الحوادث بشكل “بشع” ، اذا عارف نفسك منت قادر تسعف ولا تساعد او شفت قدامك ناس ساعدوا احمد ربك على العافيه والسلامه و ادعو للي اصابهم الحادث وتوكل على الله ، اللي وقفوا عند الحادث ما أبالغ اذا قلت انهم قريب ٢٠٠ شخص ، اللي طلعونا من السيارة ٣ اشخاص الله يجزاهم خير ولا يفجعنا ولا اياهم في عزيز وغالي ، اللي جوني وهدّوني وذكروني بالله ويتحمدون لي بالسلامه ٥ او ٦ اشخاص ، البقيّة الباقية يتفرجون ويصورون وبعضهم شفته يصوّر فيديو لتوثيق اكثر للسوالف اللي بيسولف فيها ، ما أدري حقيقة وين المتعة في مشهد حادث اصاب اخوك وسيارته مندمره ومتقلبه وثيابه ويدينه دم ويدور من غير شعوره وطايره بوهته ومرتاع !؟ انت ماتحس بثقل وجودك كمتفرج بس على الشخص اللي اصابه الحادث ولاتعرف شعوره وهو يحس ان الجميع مستمتع بالمشهد الدرامي عندهم المأساوي عنده اللي صار له ، الحادث صار أذان العصر .. طلعت من موقع الحادث للبيت على اذان المغرب وما زال في الموقع ناس واقفه وتتفرج على السياره وعلى محاكيكم وهو في حال مايعلم بها الا الله ، غير اللي لحقوني عند سيارة المرور عشان يسمعون وش بأقول ووشلون بأوصف الحادث ! من قلب من قلب ودي أمسكهم واحد واحد واقول ” وش تحس فيه و وش تبي بالضبط؟ ” يحتروني اقول صادوه !؟ .. يا أوادم !

- صور السيارة :

.. .. ..

حياكم الله ..

بعد تدوينتي “طريقة سهلة لحفظ القرآن” ، راسلتني الاخت فضاء تستأذن بطباعتها بتصرّف لطالباتها في المدرسة ، وطبعاً شي يسعد ويبعث السرور ان تكتب مايدل على خير وتلقى من يساعد على نشره ويهتم له لذلك ما وافقت <- ض٣
بعد ما طبعتها وعلقتها الله يجزاها خير ولا يحرمها الاجر صوّرتها وارسلت لي صورة من التدوينة وهي معلّقة على جدار الفصل

عاجز عن الشكر يا فضاء .. والله يجزاك خير وينفع بجهودك ويبارك فيها
-‫-‬
الموضوع الثاني .. من حطيت البوكس تبع خدمة pushme‪.‬to في القائمة الجانبية وانا تجيني رسايل جميلة وبعضها ظريفة ، لكن حقيقة واجهت صعوبة في الرد على بعضها والسبب عدم وجود وسيلة اتصال لذلك بأرد على بعضها هنا ..

الاخت ساره .. وبحجم السماء والارض اتمنى لك ايضاً خير وسعاده دائمة ، شاكر لك مشاعرك الطيبة
الاخ/الاخت Me .. عسى أيامك تحلى ، والله يسعدك ويوفقك ويحقق لك ايضاً كل ماتتمنى
الاخ/الاخت dcd .. الله يشرفك بطاعته
الاخ/الاخت .. اللي يجرب الخط وصار فيه حراره واكتشف انه مسخن هههههههههه ابشرك دفيته بفيتامين سي ودهنته بفازلين وتلحف ورقد .. والحين بخير ونعمه :p
…

على فكرة .. الفيسات او الوجوه التعبيرية طارت ، سويت ترقية للمدونة وليتني ماسويت وطارت ولا عاد عرفت ارجعها لاني نسيت الاختصارات قبل وش كانت :/ ، وانا ادري ان البعض مايقدر يكتب او يقرا بدون مايشوفها قدامه او يستخدمها ، لذلك اعتذر لكم .. ولا لو علي مافرقت واجد اهم شي عندي الفيس الاخضر ابو خشة كبيرة p:

ادري بعضكم يتابع ويزور المدونة بين فتره وثانية ومايلقى اي تحديث او تجديد ، لكن ماعندي ما يستحق العرض او التقديم للأمانة ، لو الدعوه على قول كل شي وكتابة كل شي كان كتبت وسولفت واجد وادوختكم (: لكن اسباب تجمعت وصارت “تمنعني” اكتب بنفس ماكنت ناوي اكتب او ادوّن في هالمدوّنة ، ادري هالعذر كررته واجد لكن ماعندي الا هو ههههههههه

ما انسى اشكر .. عزيزي وصديقي واخوي أبو نواف دوت كوم اللي هالمدونة استضافتها عليه ، مادفعت فيها ولا ريال واحد (: اول ما انشأتها دفع عن طريق بطاقته الفيزا وحلف علي ماحوّل له ولاريال ، وتفاجأت مع قرب انتهاء الاستضافة برسالة شكر من المستضيف لتجديدي معهم سنة قادمة .. اتصلت بأبو نواف اسأله اذا هو اللي دافع وكان رده ضحكة جميلة عسانا مانعدمها يابو نواف .. رجل يحرجني بطيب تعامله وقمة اخلاقة الله يخليه لأحبابه ، بس لاتتعودها وتجدد السنه الجايه ههههههههههه

(وردة)

اللي بأتكلم عنه الآن ماتحمست حقيقة اني اكتبه او اتكلم عنه في المدونة الا بعد رسالة شكر شفهية وصلتني من اختي ومن بنتها‪.‬
‪ كنت اعتمد طريقة في حفظ القرآن ونفعتني كثير وسهّلت علي الحفظ ونتائجها بالنسبة لي ممتازة ، وبما أن بنات اختي في مدارس تحفيظ القرآن كانت تشتكي من صعوبة حفظ وحده منهم .. ومدارس التحفيظ مقرراتهم في الحفظ طويلة ويبي لها متابعة وحفظ بشكل يومي ، وهالبنيّة متبهذلة مع هالحفظ .. مالكم بالطويلة‬
‪قلت هالطريقة لاختي والحمدلله كانت النتائج مذهله بالنسبة لها ولبنتها ، تقديرها في الحفظ صار ممتاز وبدون اي غلط ماشاء الله تبارك الله.. وهي العاده تدخل شيئاً من التوراة وبعض السوالف وسط الايات
الطريقة تعتمد على تقسيم الصفحة او الوجه لثلاث او اربع او حتى خمس مقاطع على حسب الحافظ وعمره وسرعته في الحفظ .. طبعاً التقسيم فقط مهوب طريقة فعّالة للحفظ .. بيحفظ القسم الاول والثاني والثالث واذا بدأ في الرابع بيلخبط في الاول وهكذا
طريقتي كانت ان آخر آية في القسم الاول تكون أول آية في القسم الثاني وآخر آية في القسم الثاني تكون أول آية في القسم الثالث ..الخ

طبعاً هالطريقة عشان اربط  اقسام الصفحه ببعضها في الحفظ .. كلنا نحفظ سورة الحمد .. احد جرب يقرأها نظر ؟ ممكن يحس ان فيه لخبطه لإنه تعوّد قراءتها حفظاً في كل صلاة وصارت الايات مترابطه ببعضها على لسانه وفي حفظه ولو طمر آيه للآيه اللي بعدها حس انه غلط غير لو أنه يقرأ في سورة اول مره يحفظها .. يمكن يغلط ومايحس .. شكلي ماعرفت اوصّل اللي ابي ‪ لكن الزبدة .. بتكون آخر آية في الجزء هي حلقة الوصل مع الجزء اللي يليها وفي تلاوتها حفظاً بيكون متعوّد عليها اللسان والعقل وبتسلك معه < بدت  العربجة

هذي صورة للطريقة قسّمت فيها الصفحة لثلاث اقسام وهي مناسبة للأشخاص مابين ١٣ – ٢٦ سنة > بدا يتفلسف .. امزح لاتصدقون ..الجزء الاول المحدد بالأزرق ( الآية ٤١ ) .. يكرر عشر عشرين ثلاثين مره حتى ينحفظ تماماً بعدها الجزء الثاني المحدد باللون الأخضر ( الآية ٤٥ ) ومثل الاول يكرر حتى يحفظ تماماً ثم طبعاً مراجعة للجزء الاول والثاني ثم يبدأ في الثالث المحدد باللون الأحمر ثم مراجعة للوجه كامل والحفظ بإذن الله بيكون عال العال .. وهالطريقة نفسها بعد للربط بين الأوجه .. آخر آية في الوجه تكون اول آية في الجزء الاول في الوجه التالي.

اتمنى هالطريقة تفيد احدكم ولايحرمني ربي ولا اياكم الأجر
سلام عليكم

مساءكم خيرات

بحكم أني أجّلت البعثة الدراسية لفترة طويلة شوي رجعت للرياض وبطبيعة الحال كأي انسان رايح يدرس بيصير معه عفش وبما أن المدة طويلة شحنت اغراضي معي وهنا موضوع التدوينة

قدّر الله علي و شحنت اغراضي من ملابس وكتب واغراض عزيزي يزيد بعد عن طريق شركة شحن ووصلت في الموعد المحدد وبدأت المعاناة مع الشحن السعودي في المطار ولا يهونون الجمارك

جاني اتصال منهم : الأخ عبدالرحمن ؟ قلت : اي نعم ، قال معك الشحن من مطار الملك خالد .. العفش تبعك وصل وتقدر تجي تستلمه ، قلت : يعطيك العافيه ، متى تقفلون ؟ قال دوامنا ٢٤ ساعة ، قلت كم ؟ قال ٢٤ ساعة تعال اي وقت واستلم اغراضك.
هذا كان نص المحادثة بيني وبين موظف الشحن .. وقلت بما أنه دوامهم ٢٤ ساعه بأطلع لهم متأخر احسن عشان افتك من زحمات وغيره .. وطلعت لهم الساعه عشر بالليل .. بعد ما وصلت لهم في مكانهم اللي في قلعة ودر واخذت الابلكيشن تبع الشحن وخلصت اجراءاته اللي خذت من الوقت تقريبا ٢٥ دقيقة نزلت لمستودع الشحن ورحت لمكتب في طرف المستودع على اساس استلم شحنتي وامشي تفاجأت برد الموظف يقول لي هذي لازم يشوفها المدير المناوب واستغربت قلت ليه ؟ تفتيش يعني ولا مشتبه فيني ‪ ‬قال لا بس الوقت هذا نسلّم الشحنات القابله للاتلاف ، قلت وشلون يعني ؟ قال شحنتك خاصه صح ؟ قلت ايه كلها اغراض شخصية ! قال ايه عشان كذا لازم يوافق المدير لان الاغراض الشخصية نسلمها وقت الدوام من الساعه ثمان للساعه ثنتين الظهر ! قلت تستهبلون علي انتم ؟ الموظف مكلمني وقايل لي ٢٤ ساعه وسألته مره ثانيه وقال تعال اي وقت واستلم شحنتك والاخ هذا ما اتصل الا والشحنه وعدد القطع كلها واضحه قدامه ، ليه ما قال لي من الاول ولا يعنّيني هالمشوار ! قال حنّا الجمارك واللي كلمك الشحن و الشحن دوامهم ٢٤ ساعه وحنا دوام رسمي لا تحمّلنا خطأ غيرنا ، بعدها قال لي انتظر المدير وكلمه ، قلت يعني فيه امكانية انها تطلع اغراضي الحين ؟ قال ايه ، قلت يعني لازم نترجّا ونتوسّل وهو ممكن انها تطلع بدون هالاسلوب السقيم اللي ينبسطون عليه ! عطاني ابتسامه وقال انتظره وان شاء الله بيوافق
انتظرته تقريبا ربع ساعه لمّا جاء ، ولما وصل بدأت معه بكلمات التوسل والتلطّف ثم رجيته طال عمره انه يسمح لي استلم اغراضي وهي كلها اغراض بسيطه..الخ قال لي  تعال وقت الدوام الرسمي ، قلت سلمك الله يوم يدق موظفكم قال لي دوامنا ٢٤ ساعه وانا جيت على اساس كلامه لي ، قال ايه هذا خطأ دايم يرتكبونه الشحن ويحرجوننا ، قلت دايم ؟ قال ايه كثير يصير هالشي وقلت للحين بحكم ادارتك للجمارك ماستوعبت انهم يرتكبون خطأ ويعطلون الناس ويتعبونهم على الفاضي ولانبهتهم ان الموظف بعد مايبلغ بوصول الشحنه يقول آخر شي ترى وقت الدوام من ثمان لثنتين ؟ وكن كلامي زعّله وعطاني نظره وقال لي تعال وقت الدوام الرسمي الحين منيب معطيك شي ( لاحظوا معطيك ) مع ان الاغراض خاصه فيني ما يملك فيها ولا حتى شطرطون ملزّق فيه الكرتون ‪ ‬
تحيسبت وطلعت وجيتهم من بكرا في وقت الدوام الرسمي
اول مادخلت كان فيه مكتب امن ناداني واخذ بطاقتي ورقم جوالي وعطاني بدل بطاقة الاحوال بطاقة مراجع .. احتياطات امنيه الله يجزاهم خير مايقصرووووون .. دخلت ورحت للمستودع على طول بحكم اني انتهيت من الشحن ولما وصلت الشحن وبين زحمة الناس وزحمة الاغراض وحوستها والصراخ والهواش وصلت المكتب وعطيته الورقة من الشحن تفيد بأنه لي اغراض عندهم .. سألني من وين واصله واسمي ورقم جوالي مع انها كلها مكتوبه قدامه ! عطيته اللي يبي من معلومات ومعها الرخصة بحكم ان بطاقتي مع الامن .. ختم على الورقه ووقع وبعدها قال رح للمخزن هذا ويأشر عليه .. ورحت له وجابوا لي الاغراض بعدها قال لي عامل الشحن روح جيب موظف .. قلت هاه ؟ قال جيب موظف عشان يسوي تفتيش قلت : من وين اجيب موظف ؟ وانا اضحك من قل الحيله قسم بالله تعب نفسي ورفعة ضغط ! ويأشر لي على المكتب اللي كنت عنده . رجعت للمكتب قلت عندكم موظف يجي يفتش اغراضي عشان امشي ؟ ثلاثه كل واحد قعد يناظر الثاني وكني بكل واحد فيهم يقول عسى خويي يقوم وبالصدفه مر موظف رابع من وراي وكلهم بصوت واحد يأشرون عليه يقولون هذا هذا اسمه فلان .. ناديته قال سم ؟ قلت ممكن تفتش اغراضي ؟ قال وينها ؟ قلت شفها ذيك .. انا ابي افهم يوم قال وينها وش يحس فيه ؟ يعني اغراضي في بيتنا ابيه يخاويني للبيت يفتشها ولا وش الموضوع !
مشى معي للاغراض وفتشها وبعد ماخلص قلت هاه اقرب السياره ؟ قال لا رح جب لي رقم المستورد .. قلت من وين ؟ قال من الشحن .. قلت والشحن ليه ماحطوه من قبل يوم يخلصون اوراقي ؟ قال خطأهم هذا .. عاد تخيلوا ملامح وجهي وقتها ‪:‬5‪:‬ رجعت للشحن ( وللتنبيه المسافه بين الشحن والمستودع مسافه طويله ) وصلت للشحن وكان قدامي رجال اردني ومعه ولده ، الشحنة حسب مافهمت جايه بإسم الولد ، والولد معه بطاقة هوية أردنيه ولابعد طلّع اقامه ، وكانوا يبون رقم المستورد نفس حالتي .. قال لهم الموظف ابي اقامة الولد ، قال له يا ابني الولد ما معه اقامه توّ واصل السعودية وبنستخرج له اقامه ، كان مضاف من قبل في اقامتي يوم كان صغير لكن معه بطاقة الهويه وفيها بياناته وصورته ! قال لا ابي الاقامه ، قال ياعمي الولد ما معه والله مامعه ، قال لازم الاقامه ! الاردني سكت قال يعني شلون ترجعونها ونرسلها مره ثانيه باسمي ؟ قال اممم خلاص عطني الجواز ، قال ما احد قال لي جيب الجواز ! قالوا لي بطاقة الهوية وصاحب الشحنه وبس .. قال اممم طيب اوك زين عطني بطاقة الهويه .. طيب يا منيب قايل مدامه من الاول بتقدر تخلصها ببطاقة الهويه تماطل فيه كذا لييييييييييييه !!!!!!!!
خلص منه وجاء دوري عطيته الاوراق قلت ابي رقم المستورد لاهنت ، قال عطني بطاقتك وعطيته الرخصه بحكم ان بطاقتي مع الامن ، رجعها قال لا ابي البطاقة .. قلت شكلك تنبسط على ان الواحد يترجاك !؟ ودك نكرر السيناريو اللي صار مع الاردني تو ؟ ضحك بكل بلاهه وقال لا لاني ابي تاريخ اصدار وانتهاء بطاقتك ، قلت ويومك تبي البطاقة بشكل ضروري كذا ليه ياخذها مني الامن تحت ؟ قال مالنا دخل فيهم الامن .. قلت تستهبلووووووون علي انتم ؟؟؟ امس ممشوريني بسبب خطأ واحد عندكم .. الا وينهم اللي يدقون يبلغون بوصول الشحنات ؟ قال مدري ! قلت ليه طيب ماتبلغ الامن تراكم بمكان واحد وبينكم سنترال ياخي قل لا عاد تاخذ بطاقات خذ رخص قياده ولا حطوا له آلة تصوير ويصور البطاقه ويرجعها ! قال انا موظف هنا قلت اشوى مير علمتني انك موظف احسبك جاي مسير عليهم!
اخذت رخصتي ورجعت للامن ( مع العلم ان المسافة بين مكتب الشحن وبين الامن مسافه طويله ) ويوم وصلت له حطيت رخصتي على طاولته وقلت عطني بطاقة الهويه وخذ بدالها رخصتي لان الموظف فوق يبي الهويه ضروري وعشان كذا الله يرضى عليك لا عاد تاخذ بطاقات المراجعين خذ الرخص حقتهم لانهم مهوب خالصين الا ببطاقاتهم قال لا خلاص خذ بطاقتك ورخصتك سجلت رقم البطاقه ورقم جوالك.. وقفت في وجهه قلت وبس ؟ يومك ما تحتاج الا رقم الهوية ورقم جوالي واسمي ليه يوم سجلتها مارجعت لي بطاقتي ؟ قال اممم وقام يحك راسه قال اجراءات امنيه ؟ قلت اها اجراءات اجل يعني بأطعن الموظفين ببطاقتي ولا باسوي بها عملية ارهابية ؟ .. رجعت لخوينا راعي المستورد وعطيته الورقه وبطاقة الاحوال وعطاني الرقم ورجعت للشحن .. اغراضي منطّله كأنها اغراض اللي يتسدحون في التوسعه  في رمضان وأدوّر الموظف خوينا مالقيته .. رجعت للمكتب اللي قالوا لي خله يفتش اغراضك وقلت كان فيه موظف فتش اغراضي وقال لي يبي رقم المستورد وقال رح جبه وتعال لي هنا .. ما قال لي تعال دورني في هالمستودع ! قالوا وش اسمه؟ قلت وش دراني وش اسمه ؟ قالوا عشان ندوره معك .. قلت يا جماعه تشتغلون انتم ولا تطقطقون علينا وتنبسطون ؟ قسم بالله وضعكم مزري وش هالترتيب والتنظيم عندكم ؟ لو الاغراض هذي مافيها اغراض لواحد من اخوياي ولاّ كان تركتها ! حامت كبدي قسم بالله من هالشغل.. قام شويّب وقال انا باخلصها لك عطني ورقتك عطيته الورقه وراح معي للاغراض ووقف عندها ثم نادى له موظف ثاني وجاء وقال خلص هذي .. تتوقعون وش سوا ؟ قرى عدد القطع في الورقه ثم عد القطع الموجوده قدامه ويوم صارت متطابقه شخط شخطتين على الورقه .. قلت هاه خلصنا ؟ قال لا رح الحين لمكتب الامن عشان يعطيك ورقة استلام شحنه .. رحت لمكتب الامن ومسافه كانت قصيره مقارنة بالمسافة بين الشحن والجمارك عطاني الورقة ورحت اقرب السياره عند باب الشحن.. وصلت عندهم وعطيتهم الورقه ونادوا اثنين بنقالية وشالوا اغراضي وحطوها في السياره .. وتوني راكب و محرّك الا ويلحقني بنقالي ويخبط قزازة السياره توقعت اني نسيت شي وقفت وفتحت القزازه قلت هاه ؟ قال ابغى فلوس قلت مافيه .. قال انا شيل ! قلت يعطونك راتب ؟ قال ايوا قلت عشان انت تشيل اغراض يعطونك راتب ؟ قال ايوا بس انا ابغى انتا يعطيني اجر ههههه اعطيه اجر الله يصلحه .. قلت انقلع صديق تراها حايمه كبدي .. نطل كلمتين بنقاليه جعله العله وواضح انها كانت سبّه بس في قريح مهوب اردى من اللي اعلى منه في هالمكان البئيس
وابشركم مير خلصت

طبعاً هالفلم بدأ معي من الساعه ١٢ الا ربع صباحاً وانتهيت طالع من الشحن الساعه ٢ وثلث
الشحن الجوي السعودي شعارهم الحقيقي ” نجعلك تَعَافْ اغراضك ”
مشاكل كثير ادارية وضحت لي في زيارة وحده للشحن ولا ودي ألخصها كـ نقاط لإن اللي بيقرا ماحصل لي بتوضح له بشكل جليّ ، والمشكلة في أغلب الدوائر الحكومية عندنا ان الموظف يستخدم الكرسي اللي هو عليه كـ كرسي سُلْطة مو كرسي خدمة ولاستوعب انه يستلم مرتب آخر الشهر نظير الخدمه والتسهيلات اللي يجدر به انه يقدمها لكن اللي نشوفه ونسمعه ان الغالب يستخدمه عشان يتفرعن ، وهذا اللي مخلي الواسطة هي الحل الوحيد حتى الحين قبل ما ابدأ اي معاملة في اي ادارة حكومية لازم قبلها اتصل على فلان وعلاّن اذا يعرف احد في هالدائرة اروح له ويخلصني او لا . والعذر اللي اقبح من ذنب اذا عرّيت الموظف انه مقصّر  وماخدمك بشكل مطلوب تعذّر بأن المرتب اللي يستلمه مايكفي مايقدم طال عمره ” وهذا عذر موظف سابق في وحده من الدوائر الحكومية قاله خلال نقاش ودّي ‪ ” فإذا انت تشوف المرتب مو كافي ومتسبب هالشي في تعطيل المراجعين ياخي قم عنه وخل غيرك اللي يشوفه مرتب كافي يجلس عليه ويخلص المراجعين !‬

‪بعد هالزيارة عرفت سبب اصابة الكثير من المعقبين بالصلع وامراض الضغط والسكر‬

‪* اللي بيروح يستلم اغراض .. ياخذ معه بطاقة الاحوال والرخصه وصورتين من بطاقة الاحوال او ثلاث .. وياخذ رقم المستورد اذا وصل الشحن من البداية .. ويروّق كثييييييييير قبل مايروح ‬

‪ترى التدوينة طويلة منتاب فاضي لاتقرا <= بينطق
سلام عليكم‬

حياكم الله زوّار مدونتي وكل عام وانتم بخير ، ينعاد علينا وعليكم بالخير والبركة والله يتقبل منا ومنكم صالح الاعمال
البوست هذا واللي قبله ماسكه معي على الاقتباسات

هالمرة المدوّنة نوال بنت سعد كتبت كلام جميل جداً عن العيد اقتبسه لكم

العيد كله كلمة واحدة لا أكثر لكنه يتمدد ليشمل أكثر من معنى عميق، بل أكثرها عمقا ً ، العيد فرحة وتكريم من ربنا الكريم لنا، العيد هدية من الله . العيد في ابتسامة طفل ، العيد في حلويات يتسابق عليها الصغار و الكبار .. العيد زينة و جمال ، العيد لبس جميل ومتواضع ، العيد رائحة زكية و نظافة. العيد مائدة لا ننسى منها الفقراء ونطعمهم زكاة الفطر ، العيد أن نقتدي بسنة نبينا ونفطر على تمرات كما فعل صلى الله عليه وسلم . العيد تكبيرات وصلاة وخطبة وناس كثيرة في المسجد ملتمّة لتفرح لا لتحزن أو تشجب. العيد تهنئة من أخ أو اتصال من صديق أو رسالة من بعيد . العيد ذكريات نوثقها للأيام والأزمان القادمة . العيد فرصة للنقاء و إعادة الروابط البشرية . فرصتي وفرصة الجميع أن نغفر وننسى الإساءة ونبدأ بالمباركة والتهنئة . العيد في جيوب الأطفال الممتلئة بالعيديات . العيد حب حل علينا جميعا فـ لنحبّـه .

كل سنة وانتم طيبين وبصحة و سلامة، وهالعيد وكل عيد وكل يوم يارب واحنا جميعا نتغير للأحسن ونعيش في سعادة داخلية عمييييقة.

الشهر عليكم مبارك ، وكل عام وأنتم بخير
الله يعيننا وإياكم على صيامه وقيامه وأن لا يردنا خائبين وأن يرحمنا برحمته ويشملنا بلطفه ويجعلنا ووالدينا ومن نحب من عتقائه من النار

كنت مقرر يكون هذا رمضاني الأول اللي أصومه مغترب عن أهلي وداري لكن انتقلت للخطه B المتضمنة العوده نصوم ونتعيّد مع الحبايب في الرياض في إجازة طويله لمدة شهرين اللي باغتني أبو نواف بذبة جميلة الله يسعده وقال شهرين يالظالم ! إجازة وضع هذي ههههههههههههههههههه

اخي وعزيزي علاء كتب كلام جميل في مدونته .. اقتبسته لكم

الحياة في رمضان ستختلف، إن دخلها المرء دون وقفة بسيطة مع الذات، يرسم ما له وما عليه، فإنه سيدخل الشهر ويجد نفسه في دوامة قوية دون أية سيطرة على نفسه فتقذفه مع شمس العيد.

ما أطلبه منكم أيها السادة أن تكافئوا أنفسكم بهذه الوقفة البسيطة، فإن لنفسك عليك حقاً. دع كل ما حولك جانباً، الإنترنت، جوالك، الناس، اعزل ذاتك عن تيار الحياة، واختلي بنفسك إلى مكان هادئ تحبه، وحاول أن تتأمل يومك الرمضاني المثالي، اليوم النموذجي الذي تتمناه لنفسك، منذ أن تستيقظ، وحتى تنام.

تأمله في دقيقة، دقيقة واحدة فقط! ثم عد إلى حيث كنت. أنا متأكد أن هذه الوققة، والتخيل، ستكفل شيئاً كثيراً من إنجاز ما تحب.

امس وصلتني رساله على حسابي في موقع فليكر من موقع schmap يطلبون مني الموافقة او الرفض على استخدام صورة البجعه الحياوية كـ صورة تعبيريه عن الهايد بارك في النسخة الثامنه للبروشور السياحي عن لندن اللي يصدره الموقع.

موقع schmap يهتم بالاماكن السياحيه في العالم وأغلب زواره من الولايات المتحدة الامريكية.

الصوره تم اختيارها من موقع فليكر طبعاً وبالكلمة الدلالية : Hyde Park ، والصور في موقع فليكر اللي تدل عليها هالكلمة أكثر من ٢١٤،٠٠٠ صورة

وسواء كانت صورتي هي الصوره التعبيريه الوحيده او معها مجموعة صور مجرد اختيارها من بين هالكم الكبير من الصور ومن بين مجموعة المحترفين الموجودين في موقع فليكر يخلي خشتي تصير كذا

الحمدلله اولاً واخيرا والشكر له سبحانه ، ثم شكراً ليوسف ويزيد اللي ساعدوني في اخراج الصوره بشكل افضل.

الصورة:

وهذولي بزارين يلعبون شفتهم في الهايد بارك وبصراحه كنت متوّزي وانا اصورهم لان فيه واحد قبل ماصور هالحلوين طافسني يوم جيت اصور ولده ومير انضبطت ولاصرت اصوّر الا السماء ولا البجع ( وجه يناظر بجعته اللي تحت ) وشفت ذولي اهلهم لاهين وقلت جابكم الله

كنت اتمنى يصير هالبوست فيه صور اكثر لان كل معطيات التصوير عندي .. من كاميرا و مناظر وكلش يالله الجنه ، لكن قاتل الله العجز

دعواتكم :>

يوم الاحد شفت كاريكاتير هاجد .. وهـالاخ هو واللي اسمه الماضي وكلهم بجريدة الجزيره واضح جداً ان عندهم افلاس فكري قوي بهالفن وصايره كاريكاتراتهم اقل ما يقال عنها سامجه ولا فيها اي رساله ، يعني لا هي اللي تخليك تضحك ولا هي اللي تشرح لك وضع في بلدك بشكل فني جميل

للي ما شاف الكاريكاتير يوم الاحد لـ هاجد ، كان يتكلم عن قضية المدرس اللي انقتل على يد احد طلابه بالسلاح ، الحادثه صايره لمدرس واحد من بين مئات آلاف المدرسين وبفعل طالب من بين ملايين الطلاب وفي مدرسه وحده من بين مئات آلاف المدارس تظهرها بهالشكل ليه ؟ اهل المعلم اللي انقتل ،، هالكاريكاتير مهوب في حقهم يعتبر قلة ادب ؟ انا عن نفسي تنرفزت وتخيلت هالمعلم اخو ولا ولد عم ولا صاحب انك تخليه موضوع لكاريكتيرك واللي صار له كان لوحده هو مهيب حادثه متكرره اكثر من مره هذي فيها قلة ذوق وسخافه لابعد حد , هذا غير موضوع تضخيم السالفه وهي مجرد حادثه شاذه جداً على مستوى العالم وشلون على مستوى بلدك انت !

وبما ان الكلام عن تضخيم المواضيع ، سالفة كاميرات الهيئه اللي بتضعها بالاسواق على حسب ماشرح احد الصحفيين في ملخص كتبه في الجريده لندوة اقامها الرئيس العام للهيئات الله يسدده ويوفقه ، اللي يشوف ويسمع الكلام وكأن الهيئة حطت الكاميرات في زوايا غرف نومهم وكأن الهيئة اول من حط الكاميرات بأماكن عامه وكأن الهيئة بتستورد كاميرات تخلي الواحد يطلع مفصخ في الشاشه ، غير انهم طبوا في اعراضهم بالتجسس و و و و و الخ

قبل فتره قريبه اعلنت الدوريات الامنيه انهم بيحطون كاميرات في مناطق مختلفه من المملكه على الطرق السريعه ولاشفنا اي احد من هاللي يعارضون تكلم ونطق بحرف واحد ، مع ان العلاقه بينهم والهدف من وضع الكاميرات .. سيم سيم ،، هذا غير المبلغ الخرافي في الكاميرات .. اجل كاميرا تكلفتها مليونين وشوي !
فالهدف واحد لان الدوريات وضعت الكاميرات لحفظ الامن وعشان الواحد مايسرع .. والسرعه مخالفه يعاقب عليها القانون.
والهيئة ايضاً قررت تضع الكاميرات لحفظ الاعراض وعشان الواحد مايقل ادبه .. وانتهاك الاعراض والتحرش مخالفه يعاقب عليها الشرع قبل القانون في هالبلد اللي اساسه الشرع.
على فكره اذا قلنا انتهاك الاعراض الواحد اول مايجي في باله مشهد اباحي .. انتهاك الاعراض يكون بتلفظ بمد يد بقلة ادب بشكل عام.
الدوريات الامنيه وضعت الكاميرات حفاظاً على ارواح قائدي السيارات من السرعه و( تخويفاً ) لهم من بهذلة التوقيف والغرامه.
والهيئه بتضع الكاميرات حفاظاً على اعراض الناس ( اللي هي اغلى من الروح ) من شياطين الانس و ( تخويفاً ) لهم من عقاب الله قبل عقاب الدنيا.

ولاّ يعني بالسوق مثلاً البنت بتكون كاشفه ؟ مثل ما قال واحد من الشباب كنا نتكلم بالموضوع ، يعني البنت كاشفه لستمية الف بني آدم قدامها وقفت على ظهور وجهها بالكاميرا ؟ ولو سلّمنا بعقليته وانه الصح وكلامه كويس ووش زينه ، بعد اللي يسوق ومسرع اذا رفعت حرمته نقابها بتاكل زبادي مثلاً فيه امكانيه كبيره ان وجهها يطلع بكاميرات الدوريات ام مليونين على ماقريت من مواصفاتها ان الزوم فيها قوي يطلع مسامات بشرة الوجه بعد .. وعلى هالاساس وشوله كاميرات تحفظ الامن .. حنا شعب الكاميرات بالنسبه لنا وجودها والعدم واحد

هذي المقارنه كلها ( اذا ) حطت الهيئة الكاميرات واستحدثوا وظيفه لها وصار واحد مقابل شاشات العرض من يفتح السوق لين يسكّر ، واللي اتوقعه بيصير انها بتستخدم اذا احتاجوا لها في حل قضيه .. وخطوه جبّاره من الهيئه وقويه ، لان البني آدم يكدب بس الكاميرا موش حـ تكدب .

والمقارنه بتستمر والهدف واحد والهيئه ضرورتها بالكاميرات اكثر من الدوريات لكن ( ياليت قومي يعلمون ) !

والسؤال اللي يطرح نفسه : خايفين ومستائين وغاضبين من وضع كاميرات تتبع الهيئه ليه ؟ مع ان كل مراكز التسوق فيها كاميرات تتبع امن المركز نفسه !

كاريكاتير هاجد : هنا
كاريكاتير الماضي : هنا
سخافه اكتر من كدا ايييييه ؟