موسعـ(ـن) صدرهـ

السلام عليكم ورحمة الله

مساءكم خيرات

بحكم أني أجّلت البعثة الدراسية لفترة طويلة شوي رجعت للرياض وبطبيعة الحال كأي انسان رايح يدرس بيصير معه عفش وبما أن المدة طويلة شحنت اغراضي معي وهنا موضوع التدوينة ( اكمل قراءة التدوينة )

مساءكم خير وبركه ..
كعادتي في بداية اغلب تدويناتي اعتذر منكم شديد الاعتذار عن انقطاعي .. وممتن جداً لرسائلكم اللي تسأل عن الغياب

في التدوينة اللي تسبق تسبق هالتدوينه <- عليك شرح .. قلت بآخرها برب على اساس اقول باك في التدوينه اللي بعدها اللي اسولف بها عن اول ايامي في لندن .. لكن بعد اعتذر لكم عن الكتابه وبقوه اعتذر والله .. لاسباب منها ان التعليقات تجاوزت حدود المدونة .. وهذا الشي اللي ما ابيه ودرءاً للقلق منيب كاتب عن يومياتي بنفس الاسلوب والتفاصيل اللي كتبتها بالتدوينه الاولى .. هذا مهوب وعد اني بأكتب يوميات وكذا ، لكن لو كتبت منيب متطرق للتفاصيل اللي تكون في الغالب هي ملح اليوميات  ..

التدوينه في الحقيقه كثر ماهي اعتذار لكم عن كتابة الجزء الثاني فهي ايضاً تسجيل حضور وتنبيه لبعض الحبايب اني مجرد طالب ويسأل الله التوفيق والاعانه ، ماجيب قبولات معاهد ولا قبولات جامعات ولا استرزق من وراها .. جداً آسف ودي اخدمكم لكن يالله دربيت راسي عشان اسنّع غيري معي

وآه ما ارق الرياض تالي الليل .. انا لو ابي خذتها بيدها ومشينا ( ايقونة يزيد الغريبي وهو يصفقني ) ( ايقونة اخوه ثامر وهو يفك بيننا )

السلام عليكم

يالله ان تحييهم يالله
في البداية مشكورين مشكورين مشكورين بالثلاث الله يجزاكم خير على كلامكم ومشاعركم الطيبه بتعليقاتكم على البوست اللي قبل هذا
وشكر خاص للاخ عوف محمد .. احرجني بكلامه الطيب الله يرفع قدره برساله على الايميل وقلت ارد عليه هنا افضل
والغالين عبدالعزيز وابو حمد وعساف اكبر فنان في تركيب المسارح المنزليه والامير مشاري هههههه ماقصرتوا والله بجيّتكم للمطار .. اسعدتوني عسى الله يسعد قلوبكم بطاعته

وبالنسبه للمدونه فهمتوا غلط الله يرضى عليكم انا قلت باخليها بعهدة اخوي لان التعليقات تحتاج موافقه وخلافه وقلت لاخوي يمسكها فترة غيابي وبهالفتره قلت انها حلاله لو يبي يقفلها فدا رجليه لاني عارف مهوب مقفلها عشانه مايعرف اصلا .. لاني ماكنت ادري عن وضعي هنا هل باقدر ادخل نت بشكل مستمر او لا .. وبس =)
==

وصلنا اللندن ومغطناها وتمرمطنا فيها والحمدلله اكشن حلو ونذكره ان شاء الله دايمن دايمن

الكلام يمكن يكون طويل نبدأه بالعناوين ( اكمل قراءة التدوينة )

ساعات وبتقلع بي الخطوط السعودية الى لندن

من اهم القرارات اللي اتخذتها اذا ما كان الأهم ، الله يجعل هالقرار فاتحة خير لي في الدنيا والآخرة

من شهر رمضان اللي فات وانا على رجل ، كانت الوجهه والنيّة لـ كندا لكن واجهتني صعوبة معادلة الدبلوم عندهم وما يعادلون الا ساعات قليلة فحوّلنا لـ بريطانيا
المعادلة عندهم سهله ويعادلون السنتين بسنتين في كذا جامعة هناك ، قدّمت على جامعة ساوثامبتون والى الآن ماوصلني القبول منهم ؛ لإن قبولي بيحتاج يعادلون درجات المواد اللي درست وياخذون ويخلون واللزي منهو ، وان شاء الله تتيّسر ويكتب الله لي اللي فيه الخير .. دعواتكم

لمن يهتم بالمدونة.. اعتذر لكم عن قصوري بالمدونة طيلة الفترة اللي راحت .. لكن هالهم والأمر ماخذ كل وقتي.
لمن لا يهتم بالمدونة.. لاتهتم ولا تحاول لان ماعندي الا الضعوي .

في هالعالم ناس تخدمك مثل ماتخدم نفسها بالضبط ، وتهتم لهمك وتفرح لا خدمت صاحب وصديق ومنهم الاخت منال الله يجزاها عني بالجنه ، ماقصرت ابد ابد ، خدمتني بكل شي من إلى ، من تقديمي للمعهد والمراسلات معهم بحكم ان ثقافتي يوغسلافيه إلى تقديم الفيزا لدرجة ان الشي الوحيد اللي سويته بالفيزا بدون مساعدتها اني دبست صورتي بالابلكيشن
الله يوفقها ويسعدها ويكفيها ما أهمّها ويرزقها من حيث لا تحتسب
وعسى الله يقدرنا نرد ولو بعض الجميل

عبدالعزيز – يوسف  – يزيد – ابو فارس
الله يجزاكم كل الخير ويوفقكم وييسّر اموركم ، و الله لا يخيّب لكم تعب .. بأصيح

المدونة بأسلمها لأخوي سعد وهي في عهدته الى أجل غير مسمى يكتب يحذف يوافق للردود ولو بغى يقفلها تفدى راسه

دعواتكم يا أحباب
فمان الله

*تحديث بواسطة: سـعـد

سلام عليكم

قبل شوي أقلعت طيارة أبو داحم من المطار ( أجل من حوش بيتكم )

ما كان في راسي أكتب ولا أعدل شي

لكن حبيت أشكر نيابة عن موسعن طبعا بعض الأشخاص اللي ما تدري شلون تشكرهم

مشاري .. عبدالعزيز .. سليمان .. عساف.

تعنّوا و أتعبوا أنفسهم و كانوا بالمطار اليوم .. الله يسعدهم و يجمعنا على طاعته

أشكر كل اللي مرّ و بـ يمر من هنا

أنوّه عن شغله بسيطة أني إذا حاولت أدوّن هنا .. تأكدوا أنه مرتبط بقليل أو كثير بـ موسعن صدرهـ لأنها مدونته وهو وحدهـ من يملى الفراغ الموجود.

سلام عليكم

صباح الخيرات والبركات واللحمات الشهيات < ياي

كل عام وانتم بخير يا زوّار يا كرام .. ينعاد علينا وعليكم يارب بالصحه والعافيه

قبل اسبوع من الآن كنت مقرر والشلة السعيدة " شلة رمضان " مشاري وسعد ومعنا واحد جديد اسمه محمد ومحمد هذا اخو مشاري ان هالوقت نكون في مكة ومأدين مناسك الحج وقاضين فرضنا ومعينين من الله خير ، لكنها ماتيسرت وتكيسل مجلس الشورى الله يتوب علي فتكاسلت معه باقي الدوائر الحكوميه هههههههههه
بالمناسبه محمد الى الآن ما اوكلت له مهمة حكومية .. تأجلت لحين السفر لاي مكان لو نسافر للغاط مهيب مشكله .. احس بعضكم للحين مافهم وش انا اقول .. فلا يفهم ابرك له

عيد الاضحى وللمره الثالثه على التوالي يمن الله علي ويسخّر لي اوبيي الله يطول بعمره على العز والطاعه ويختارني من بين اخواني لأكون المرافق له صبحية العيد عشان يستقبل اللي يجيه من المعيدين < ابو متعب خخخ ، مع ان محّد يجي كلّن لاهي مع ضحاياه بس هذا لا قالوا فلان مسخّر الله له  ، فينزاح عني هم الصلخ وود صحن اللحم وجب الصحن لا فرغوه وهلّم جرّا ، وماقصروا اخواني قالو بها كلها عسى الله يعطيهم الصحه والعافيه ويجعل هالمهمه موكله لهم اعواماً مديده

الله يتقبل منا ومنكم صالح الاعمال ويوفق الحجاج لاكمال حجهم وييّسر عليهم ويعيدهم لأهاليهم سالمين غانمين كيوم ولدتهم امهاتهم
 

صباحكم ورد ، وجمعه مباركة

بعض التجديد طرأ على هالحبيبة وحبيت اتكلم عنه

قبل ما افتح المدونة كان في الدمجه كلام كثير ، كنت اظن اني اقدر اعبر عنه او اكتب ، وما كنت وقتها صديق حميم للقلم ولا كنت ابي اكتب بمنتديات فما جربت الكتابة قبل ما افتح المدونة ، وبعد مافتحتها وجيت انقل مافي البال للمدونة لقيت المهمة صعبه حبتين ، وبدت وسوسة اغلاق المدونه تطن براسي ، لكن شفت هالاقبال عليها ماشاء الله وقلت على الاقل اخليهم ان مالقوا عندي شي ادلهم على اللي عندهم شي

القائمة الجديدة اللي اضفتها هي قائمة "ادعمها" وفيها مواقع تستحق التحية والشكر والتشجيع ..
ايضاً قائمة هيك وهيك وهي هيك وهي يعني <- لاياشيخ!
والاضافة الجديدة للمدونه هي "متّع سمعك" صفحة فيها مجموعة من الاناشيد اللي اعجبتني ، وبالمناسبة اغلبها ع المود الحزين يعني اللي مفرفش لايتعب اتصاله بالتحميل صاير تناقض بين النك نيم ومود الاناشيد ههههه ، وبإذن الله بتكون الصفحة محدثة باستمرار

دمتم تمام