السلام عليكم ورحمة الله
الحمدلله حمداً كثيرا ،
ليتخيل احدكم الموت على هيئة رجل .. يقبل عليه ويضمه ضمّه يبي فيها قبض الروح ، ثم يتركه ويرد له ربي روحه ويجعل الحياة ترجع له ..
هذا الشعور هو اللي عشناه بالضبط عصر يوم السبت الماضي بسبب أكمل قراءة بقية الموضوع »
السلام عليكم ورحمة الله وبركاته
حياكم الله ..
بعد تدوينتي “طريقة سهلة لحفظ القرآن” ، راسلتني الاخت فضاء تستأذن بطباعتها بتصرّف لطالباتها في المدرسة ، وطبعاً شي يسعد ويبعث السرور ان تكتب مايدل على خير وتلقى من يساعد على نشره ويهتم له لذلك ما وافقت <- ض٣
بعد ما طبعتها وعلقتها الله يجزاها خير ولا يحرمها الاجر صوّرتها وارسلت لي صورة من التدوينة وهي معلّقة على جدار الفصل
عاجز عن الشكر يا فضاء .. والله يجزاك خير وينفع بجهودك ويبارك فيها
--
الموضوع الثاني .. من حطيت البوكس تبع خدمة pushme.to في القائمة الجانبية وانا تجيني رسايل جميلة وبعضها ظريفة ، لكن حقيقة واجهت صعوبة في الرد على بعضها والسبب عدم وجود وسيلة اتصال لذلك بأرد على بعضها هنا ..
الاخت ساره .. وبحجم السماء والارض اتمنى لك ايضاً خير وسعاده دائمة ، شاكر لك مشاعرك الطيبة
الاخ/الاخت Me .. عسى أيامك تحلى ، والله يسعدك ويوفقك ويحقق لك ايضاً كل ماتتمنى
الاخ/الاخت dcd .. الله يشرفك بطاعته
الاخ/الاخت .. اللي يجرب الخط وصار فيه حراره واكتشف انه مسخن هههههههههه ابشرك دفيته بفيتامين سي ودهنته بفازلين وتلحف ورقد .. والحين بخير ونعمه :p
…
على فكرة .. الفيسات او الوجوه التعبيرية طارت ، سويت ترقية للمدونة وليتني ماسويت وطارت ولا عاد عرفت ارجعها لاني نسيت الاختصارات قبل وش كانت :/ ، وانا ادري ان البعض مايقدر يكتب او يقرا بدون مايشوفها قدامه او يستخدمها ، لذلك اعتذر لكم .. ولا لو علي مافرقت واجد اهم شي عندي الفيس الاخضر ابو خشة كبيرة p:
ادري بعضكم يتابع ويزور المدونة بين فتره وثانية ومايلقى اي تحديث او تجديد ، لكن ماعندي ما يستحق العرض او التقديم للأمانة ، لو الدعوه على قول كل شي وكتابة كل شي كان كتبت وسولفت واجد وادوختكم (: لكن اسباب تجمعت وصارت “تمنعني” اكتب بنفس ماكنت ناوي اكتب او ادوّن في هالمدوّنة ، ادري هالعذر كررته واجد لكن ماعندي الا هو ههههههههه
ما انسى اشكر .. عزيزي وصديقي واخوي أبو نواف دوت كوم اللي هالمدونة استضافتها عليه ، مادفعت فيها ولا ريال واحد (: اول ما انشأتها دفع عن طريق بطاقته الفيزا وحلف علي ماحوّل له ولاريال ، وتفاجأت مع قرب انتهاء الاستضافة برسالة شكر من المستضيف لتجديدي معهم سنة قادمة .. اتصلت بأبو نواف اسأله اذا هو اللي دافع وكان رده ضحكة جميلة عسانا مانعدمها يابو نواف .. رجل يحرجني بطيب تعامله وقمة اخلاقة الله يخليه لأحبابه ، بس لاتتعودها وتجدد السنه الجايه ههههههههههه
(وردة)
السلام عليكم
مساءكم خير وبركة
اللي بأتكلم عنه الآن ماتحمست حقيقة اني اكتبه او اتكلم عنه في المدونة الا بعد رسالة شكر شفهية 
وصلتني من اختي ومن بنتها.
كنت اعتمد طريقة في حفظ القرآن ونفعتني كثير وسهّلت علي الحفظ ونتائجها بالنسبة لي ممتازة ، وبما أن بنات اختي في مدارس تحفيظ القرآن كانت تشتكي من صعوبة حفظ وحده منهم .. ومدارس التحفيظ مقرراتهم في الحفظ طويلة ويبي لها متابعة وحفظ بشكل يومي ، وهالبنيّة متبهذلة مع هالحفظ .. مالكم بالطويلة أكمل قراءة بقية الموضوع »
السلام عليكم ورحمة الله
مساءكم خيرات
بحكم أني أجّلت البعثة الدراسية لفترة طويلة شوي رجعت للرياض وبطبيعة الحال كأي انسان رايح يدرس بيصير معه عفش وبما أن المدة طويلة شحنت اغراضي معي وهنا موضوع التدوينة أكمل قراءة بقية الموضوع »
السلام عليكم ورحمة الله وبركاته
حياكم الله زوّار مدونتي وكل عام وانتم بخير ، ينعاد علينا وعليكم بالخير والبركة والله يتقبل منا ومنكم صالح الاعمال
البوست هذا واللي قبله ماسكه معي على الاقتباسات
هالمرة المدوّنة نوال بنت سعد كتبت كلام جميل جداً عن العيد اقتبسه لكم
العيد كله كلمة واحدة لا أكثر لكنه يتمدد ليشمل أكثر من معنى عميق، بل أكثرها عمقا ً ، العيد فرحة وتكريم من ربنا الكريم لنا، العيد هدية من الله . العيد في ابتسامة طفل ، العيد في حلويات يتسابق عليها الصغار و الكبار .. العيد زينة و جمال ، العيد لبس جميل ومتواضع ، العيد رائحة زكية و نظافة. العيد مائدة لا ننسى منها الفقراء ونطعمهم زكاة الفطر ، العيد أن نقتدي بسنة نبينا ونفطر على تمرات كما فعل صلى الله عليه وسلم . العيد تكبيرات وصلاة وخطبة وناس كثيرة في المسجد ملتمّة لتفرح لا لتحزن أو تشجب. العيد تهنئة من أخ أو اتصال من صديق أو رسالة من بعيد . العيد ذكريات نوثقها للأيام والأزمان القادمة . العيد فرصة للنقاء و إعادة الروابط البشرية . فرصتي وفرصة الجميع أن نغفر وننسى الإساءة ونبدأ بالمباركة والتهنئة . العيد في جيوب الأطفال الممتلئة بالعيديات . العيد حب حل علينا جميعا فـ لنحبّـه .
كل سنة وانتم طيبين وبصحة و سلامة، وهالعيد وكل عيد وكل يوم يارب واحنا جميعا نتغير للأحسن ونعيش في سعادة داخلية عمييييقة.
السلام عليكم ورحمة الله
الشهر عليكم مبارك ، وكل عام وأنتم بخير
الله يعيننا وإياكم على صيامه وقيامه وأن لا يردنا خائبين وأن يرحمنا برحمته ويشملنا بلطفه ويجعلنا ووالدينا ومن نحب من عتقائه من النار
كنت مقرر يكون هذا رمضاني الأول اللي أصومه مغترب عن أهلي وداري لكن انتقلت للخطه B المتضمنة العوده نصوم ونتعيّد مع الحبايب في الرياض في إجازة طويله لمدة شهرين اللي باغتني أبو نواف بذبة جميلة الله يسعده وقال شهرين يالظالم ! إجازة وضع هذي ههههههههههههههههههه
اخي وعزيزي علاء كتب كلام جميل في مدونته .. اقتبسته لكم
الحياة في رمضان ستختلف، إن دخلها المرء دون وقفة بسيطة مع الذات، يرسم ما له وما عليه، فإنه سيدخل الشهر ويجد نفسه في دوامة قوية دون أية سيطرة على نفسه فتقذفه مع شمس العيد.
ما أطلبه منكم أيها السادة أن تكافئوا أنفسكم بهذه الوقفة البسيطة، فإن لنفسك عليك حقاً. دع كل ما حولك جانباً، الإنترنت، جوالك، الناس، اعزل ذاتك عن تيار الحياة، واختلي بنفسك إلى مكان هادئ تحبه، وحاول أن تتأمل يومك الرمضاني المثالي، اليوم النموذجي الذي تتمناه لنفسك، منذ أن تستيقظ، وحتى تنام.
تأمله في دقيقة، دقيقة واحدة فقط! ثم عد إلى حيث كنت. أنا متأكد أن هذه الوققة، والتخيل، ستكفل شيئاً كثيراً من إنجاز ما تحب.
