موسعـ(ـن) صدرهـ

مساء الخير ،

يوم الاحد شفت كاريكاتير هاجد .. وهـالاخ هو واللي اسمه الماضي وكلهم بجريدة الجزيره واضح جداً ان عندهم افلاس فكري قوي بهالفن وصايره كاريكاتراتهم اقل ما يقال عنها سامجه ولا فيها اي رساله ، يعني لا هي اللي تخليك تضحك ولا هي اللي تشرح لك وضع في بلدك بشكل فني جميل

للي ما شاف الكاريكاتير يوم الاحد لـ هاجد ، كان يتكلم عن قضية المدرس اللي انقتل على يد احد طلابه بالسلاح ، الحادثه صايره لمدرس واحد من بين مئات آلاف المدرسين وبفعل طالب من بين ملايين الطلاب وفي مدرسه وحده من بين مئات آلاف المدارس تظهرها بهالشكل ليه ؟ اهل المعلم اللي انقتل ،، هالكاريكاتير مهوب في حقهم يعتبر قلة ادب ؟ انا عن نفسي تنرفزت وتخيلت هالمعلم اخو ولا ولد عم ولا صاحب انك تخليه موضوع لكاريكتيرك واللي صار له كان لوحده هو مهيب حادثه متكرره اكثر من مره هذي فيها قلة ذوق وسخافه لابعد حد , هذا غير موضوع تضخيم السالفه وهي مجرد حادثه شاذه جداً على مستوى العالم وشلون على مستوى بلدك انت !

وبما ان الكلام عن تضخيم المواضيع ، سالفة كاميرات الهيئه اللي بتضعها بالاسواق على حسب ماشرح احد الصحفيين في ملخص كتبه في الجريده لندوة اقامها الرئيس العام للهيئات الله يسدده ويوفقه ، اللي يشوف ويسمع الكلام وكأن الهيئة حطت الكاميرات في زوايا غرف نومهم وكأن الهيئة اول من حط الكاميرات بأماكن عامه وكأن الهيئة بتستورد كاميرات تخلي الواحد يطلع مفصخ في الشاشه ، غير انهم طبوا في اعراضهم بالتجسس و و و و و الخ

قبل فتره قريبه اعلنت الدوريات الامنيه انهم بيحطون كاميرات في مناطق مختلفه من المملكه على الطرق السريعه ولاشفنا اي احد من هاللي يعارضون تكلم ونطق بحرف واحد ، مع ان العلاقه بينهم والهدف من وضع الكاميرات .. سيم سيم ،، هذا غير المبلغ الخرافي في الكاميرات .. اجل كاميرا تكلفتها مليونين وشوي !
فالهدف واحد لان الدوريات وضعت الكاميرات لحفظ الامن وعشان الواحد مايسرع .. والسرعه مخالفه يعاقب عليها القانون.
والهيئة ايضاً قررت تضع الكاميرات لحفظ الاعراض وعشان الواحد مايقل ادبه .. وانتهاك الاعراض والتحرش مخالفه يعاقب عليها الشرع قبل القانون في هالبلد اللي اساسه الشرع.
على فكره اذا قلنا انتهاك الاعراض الواحد اول مايجي في باله مشهد اباحي .. انتهاك الاعراض يكون بتلفظ بمد يد بقلة ادب بشكل عام.
الدوريات الامنيه وضعت الكاميرات حفاظاً على ارواح قائدي السيارات من السرعه و( تخويفاً ) لهم من بهذلة التوقيف والغرامه.
والهيئه بتضع الكاميرات حفاظاً على اعراض الناس ( اللي هي اغلى من الروح ) من شياطين الانس و ( تخويفاً ) لهم من عقاب الله قبل عقاب الدنيا.

ولاّ يعني بالسوق مثلاً البنت بتكون كاشفه ؟ مثل ما قال واحد من الشباب كنا نتكلم بالموضوع ، يعني البنت كاشفه لستمية الف بني آدم قدامها وقفت على ظهور وجهها بالكاميرا ؟ ولو سلّمنا بعقليته وانه الصح وكلامه كويس ووش زينه ، بعد اللي يسوق ومسرع اذا رفعت حرمته نقابها بتاكل زبادي مثلاً فيه امكانيه كبيره ان وجهها يطلع بكاميرات الدوريات ام مليونين على ماقريت من مواصفاتها ان الزوم فيها قوي يطلع مسامات بشرة الوجه بعد .. وعلى هالاساس وشوله كاميرات تحفظ الامن .. حنا شعب الكاميرات بالنسبه لنا وجودها والعدم واحد

هذي المقارنه كلها ( اذا ) حطت الهيئة الكاميرات واستحدثوا وظيفه لها وصار واحد مقابل شاشات العرض من يفتح السوق لين يسكّر ، واللي اتوقعه بيصير انها بتستخدم اذا احتاجوا لها في حل قضيه .. وخطوه جبّاره من الهيئه وقويه ، لان البني آدم يكدب بس الكاميرا موش حـ تكدب .

والمقارنه بتستمر والهدف واحد والهيئه ضرورتها بالكاميرات اكثر من الدوريات لكن ( ياليت قومي يعلمون ) !

والسؤال اللي يطرح نفسه : خايفين ومستائين وغاضبين من وضع كاميرات تتبع الهيئه ليه ؟ مع ان كل مراكز التسوق فيها كاميرات تتبع امن المركز نفسه !

كاريكاتير هاجد : هنا
كاريكاتير الماضي : هنا
سخافه اكتر من كدا ايييييه ؟

*كليك ع الصوره لرؤيتها بالحجم الطبيعي.

Hyde Park - London
Canon 40D - 50mm

مساءكم خيرات وبركات الوقيان <= انا لله

مثل مالجميع يدري ان الكويت عندهم انتخابات لمجلس الأمه وتستنفذ في وقت الترشيح للمجلس كل الطاقات والجهود من المرشحين لكسب الاصوات ، وكل مرشّح بطبيعة الحال بيحاول الظهور بأفضل شكل يضمن له اكثر عدد ممكن من الاصوات.

المرشح محمد المطير .. مرشح كويتي <= لا ياشيخ ! الزبدة انه مسوي اعلان بطل حقيقةً .. اترككم معه : أكمل قراءة بقية الموضوع »

مساءكم خير وبركه ..
كعادتي في بداية اغلب تدويناتي اعتذر منكم شديد الاعتذار عن انقطاعي .. وممتن جداً لرسائلكم اللي تسأل عن الغياب

في التدوينة اللي تسبق تسبق هالتدوينه <- عليك شرح .. قلت بآخرها برب على اساس اقول باك في التدوينه اللي بعدها اللي اسولف بها عن اول ايامي في لندن .. لكن بعد اعتذر لكم عن الكتابه وبقوه اعتذر والله .. لاسباب منها ان التعليقات تجاوزت حدود المدونة .. وهذا الشي اللي ما ابيه ودرءاً للقلق منيب كاتب عن يومياتي بنفس الاسلوب والتفاصيل اللي كتبتها بالتدوينه الاولى .. هذا مهوب وعد اني بأكتب يوميات وكذا ، لكن لو كتبت منيب متطرق للتفاصيل اللي تكون في الغالب هي ملح اليوميات  ..

التدوينه في الحقيقه كثر ماهي اعتذار لكم عن كتابة الجزء الثاني فهي ايضاً تسجيل حضور وتنبيه لبعض الحبايب اني مجرد طالب ويسأل الله التوفيق والاعانه ، ماجيب قبولات معاهد ولا قبولات جامعات ولا استرزق من وراها .. جداً آسف ودي اخدمكم لكن يالله دربيت راسي عشان اسنّع غيري معي

وآه ما ارق الرياض تالي الليل .. انا لو ابي خذتها بيدها ومشينا ( ايقونة يزيد الغريبي وهو يصفقني ) ( ايقونة اخوه ثامر وهو يفك بيننا )

تدوينة سابقة أعيد نشرها لملائمتها بالموضوع

كتب أحدهم في مدونتها

اروح وارجع لهذه المدونه اقراء ابكي تنهمر دموه تحتبس دموع لم اقرر ان اكتب ابدا الا في هذه الساعة اكتبي والدمعة بعد مرور ثلاث ايام على وفاتها ترقرق من عيني انا اقسى قلب انسان في المسلمين عمري 38 سنه لم اركع لله ركعه الا في صغري في المدرسه وعلى غير وضواء ماتركت نوع من المسكرات ولا المخدرات الا لي صولات وجولات مات ابوي واقارب لي واصدقاء اقسم بالله اني كنت امثل البكاء ولا ينزل قطره من عيني اعلنها لكل من كتب حرف وتسبب في وجود هذه المدونه اني أشهد ان لاله الا الله وانا محمد عبده ورسوله واتوب لله وبعد ادخال هذا التعليق سأتوضا واصلي الله يرحمك يا هديل

بغضّ النظر هل ماكتب حقيقة أو لا فإن الحقيقة التي يعلمها الجميع أن هديل لم تكن عادية ، وكانت مؤثرة في حياتها وبعد مماتها عليها رحمة الله. هذا التأثير وهذا الكم الهائل من الحب الذي وضعه الله في قلوب الناس لها لم يكن لإنها توزّع الأموال كل يوم في بيتها ولا لإن عقلها كان يستوعب أكبر من ما يستوعبه أترابها ، لكنها كانت صاحبة مبدأ وعمل ، في بيتها وتأثيرها يمتد لبلادٍ أخرى ، مستترة بالحجاب الشرعي وتجاوزت كل حُجب التقاليد البالية والأفكار الخبيثة وأثبتت أن الفتاة المسلمة العفيفة قادرة على أن تعمل وتنجز وتبدع دون نزعٍ لحجاب وتركٍ لتعاليم دينها.

لا شك أن القبول عند الناس من النعم العظيمة التي يختص الله بها بعض عباده وهديل كانت منهم بلا شك ، لكن القبول وحده لايكفي لإن تكون الفتاة بهذا القدر من العطاء والبذل ، إلا إذا صاحبَهُ علمٌ وعمل وإعتلاء في النهج والتفكير والاهتمامات ومبدأ قويم لا يتأثر بسفاسف الأمور.”وهذا ما لمسته منها في طرحها وتدويناتها”

ما أصاب هديل كان رسالة للجميع أن الأجساد و (الرؤوس ) المريضة هي التي لا تؤثر في غيرها ولا تتأثر ، وحين ماتت أحيت قلوب كثيرين وأماتت الهوان والعجز في قلوب كثيرين أيضاَ.

فهل نجعل من وفاتها حياةً لقلوبنا ونرى من فتياتنا ألفَ هديلٍ وهديلٍ أخرى ؟
أسأل الله العظيم بمنّه وكرمه أن يرحمها رحمةً واسعةً وأن يجمعها مع من أحبها وأحبته في الفردوس الأعلى وأن يخلف علينا خيراً منها، اللهم آمين

صدر لـ هديل - عليها رحمة الله - الكتاب الثاني لها بعنوان : غرفة خلفية ، جَمعه ونقّحه والدها الدكتور محمد الحضيف ، الكتاب تزامن نشره مع افتتاح معرض الكتاب بالرياض وهو حصري الآن في المعرض.

السلام عليك هديل : يوم ولدت ، ويوم تموتين .. ويوم تبعثين حية ، برفقة مريم العذراء .. التي أحببَتِها

السلام عليكم

يالله ان تحييهم يالله
في البداية مشكورين مشكورين مشكورين بالثلاث الله يجزاكم خير على كلامكم ومشاعركم الطيبه بتعليقاتكم على البوست اللي قبل هذا
وشكر خاص للاخ عوف محمد .. احرجني بكلامه الطيب الله يرفع قدره برساله على الايميل وقلت ارد عليه هنا افضل
والغالين عبدالعزيز وابو حمد وعساف اكبر فنان في تركيب المسارح المنزليه والامير مشاري هههههه ماقصرتوا والله بجيّتكم للمطار .. اسعدتوني عسى الله يسعد قلوبكم بطاعته

وبالنسبه للمدونه فهمتوا غلط الله يرضى عليكم انا قلت باخليها بعهدة اخوي لان التعليقات تحتاج موافقه وخلافه وقلت لاخوي يمسكها فترة غيابي وبهالفتره قلت انها حلاله لو يبي يقفلها فدا رجليه لاني عارف مهوب مقفلها عشانه مايعرف اصلا .. لاني ماكنت ادري عن وضعي هنا هل باقدر ادخل نت بشكل مستمر او لا .. وبس =)
==

وصلنا اللندن ومغطناها وتمرمطنا فيها والحمدلله اكشن حلو ونذكره ان شاء الله دايمن دايمن

الكلام يمكن يكون طويل نبدأه بالعناوين أكمل قراءة بقية الموضوع »