موسعـ(ـن) صدرهـ

سلامون عليهم

اليوم نزلت النتايج ، والحمدلله نجحت مثل ماكنت متوقع
مادة التقارير المالية هي اللي كوّش عليها هالفيس الأخضر ولاحول ولا قوة إلا بالله ههههه كنت متوقع أجيب على الأقل B لكن هذا السهر ومايسوي .. دخلت للإختبار وانا مواصل وكانت تبدا 10.30 لدرجة اني كذا مرة غفيت في الاختبار لكن الحمدلله جت على كذا ولاحملتها
مادة الجداول الالكترونية كان مواعدني بالـ A+ بس مدري وش بلاه الله يهديه قلب وعطاني C+
المعدل ارتفع هالترم تسع نقاط ، ومأمل ان شاء الله أرفعه أكثر بالتطبيق

هالتقرير اهون من تقرير الترم اللي راح .. كان مربّع من كثر الفيسات الخضر اللي فيه

مساء الخيرات
صورة قديمة موجودة بالجهاز من ايام عيد الاضحى
بس كنت متكيسل اسوي فيها شي مثلها مثل غيرها من الصور ، بس بعد ما سويت معرض في الديفينت ارت تحمست اعدل على اللي موجود عندي واحطه فيه

بورتريه لمحمد ولد اخوي الله يحفظهم اثنينهم يوم العيد
كليك ع الصورة

ماشاء الله
- - - -
Make: Canon
Model: Canon EOS 400D DIGITAL
Shutter Speed: 1/100 second
F Number: F/5.6
Focal Length: 51 mm
ISO Speed: 100

اللهم لك الحمد حتى ترضى ولك الحمد اذا رضيت ولك الحمد بعد الرضى

اليوم كان آخر أيامي في دراسة الدبلوم ، أيام مرت سريعة كـ لمح البصر .. ما أذكرها بخير الا يسير .. أحداث سيئة ونفسيات دمار مرت علي خلال الدراسة في الكلية التقنية .. تمنيت انها تكون من أجمل محطات حياتي < - اخس ياحمد الجاسر ، لكن قدّر الله وما شاء فعل <- لين هالحين ماخذ مقلب خخخخ

أنتهيت اليوم من آخر اختباراتي في دبلوم المحاسبة المالية الجميلة وبقي لي التطبيق العملي بيكون من 4-7 إلى 10-9 ، وعسانا نطيح بشركة دوامها حليل ومديرها وش حليله بعد ويتعاون معي في الدوام ( وجه يناظر المهند ) عاد هالتطبيق صادف عز الحر و10 ايام برمضان ، لكن ضيعت سنتين بجامعة الإمام ولا ودّي اتأخر أكثر في الدبلوم فقررت التطبيق في هالصيف وعسى الله يعين. دعواتكم بالتيسير وبالتوفيق في الدنيا والآخرة

*الصورة تعبيرية مهيب صورتي < - لاه عاد

مساءكم خير وبركه واجب تدويني ممر من الاستاذه ندى الفجر

يقول الواجب تكلم عن ستة اسرار لا يعرفها من يقابلك لأول مرة بس دامها اسرار فالأفضل تبقى اسرار .. المفروض يكون السؤال ستة خصال او اشياء فيك لايعرفها من يقابلك لأول مرة <– ياليل الفلسفة

1- عندي قدرة مدري وش تبي وهي اني اضبط لهجة المتحدث معي ، خصوصاً اذا كانت المحادثة كتابية مع كثرة الحديث تنقلب اللهجة معي لنفس لهجة اللي يسولف معي .. كذا مرة بنص السوالف يجيني هالسؤال مسرع : عبدالرحمن انت من وين ؟ ماعدا لهجتين الحجازية ولهجة اهل الجنوب.

2- حساس جداً للنقد اذا كان موجّه لي وجهاً لوجه ( انت فيك وفيك ) يعني اللي ملاحظ علي شي وناوي يقولها لي بوجهي يكتبها ويرسلها بإيميل مهوب له اصرف لي وله

3- أكره الاستهزاء بخُلق أو خلقة اي شخص حتى لو كان من باب الضحك والعيارة.

4- راعي هواجيس بنص السوالف فـ التسليك عندي مدّهر

هذي هي الاشياء الاساسية .. الباقي اللي ببالي تختلف من شخص لآخر واعتذر عن تمرير الواجب .. الواجب قديم واتوقع مر على اغلب المدونين خصوصاً ان كل مدون مرره لستة غيره واحب اعتذر منك ياندى على هالتأخير بس ظروف الامتحانات الله يستر هالواجب ماحليت الا اربع ولا مررته لأحد وفوق هذا متأخر .. شكلي بأحمله

الشيخ محمد العوضي وموقفه مع أبو لـكّه

مررت لي الانثى البنت الفتاة الست الحرمه

female

واجب تدويني عن ذكريات التعليم

1- أفضل مرحلة تعليمية درستها ؟
المرحلة الثانوية

2- أسوأ مرحلة تعليمية مرت عليك ؟
المرحلة المتوسطة

3- أفضل المدرسين اللي مروا عليك ؟
في المدارس .. د.سلطان السلطان ، د. إبراهيم الجمعه ، أ. فهد النفيسه ، أ.عبدالله السراء ، أ.محمد الصالح ، أ.عبد الإله الحصيني ، أ.محمد الهويمل
في الجامعه والكلية ..
الشيخ سعد الخثلان ، الشيخ يوسف الأحمد ،الشيخ خالد البكر ،الشيخ عصام العويد ، الشيخ فؤاد الغنيم ، أ.عبدالمجيد الفايز ، أ.عبدالرحمن الحامد

4- أحب المواد اللي درستها ؟
مواد الحاسب بشكل عام ، البلاغة والنقد وفي رواية [ البلاهه والنكَد ] المادة كانت صعبه لكن ممتعه تظهر جمال اللغة العربية ، الفيزياء : d ، مزاجي مدري وش يبي بالمواد .. مافيه تناسق ابد ههههههه

5- أكره المواد اللي مرت عليك ؟
مافيه أكره لكن اصعب لإن العلم ما يكره ابداً <– صح يا فاهم
اصعبها كانت اصول الفقه درستها بكلية الشريعه ، ومادة محاسبة شركات الاشخاص درستها في المحاسبة ، ومادة الكيمياء في الثانوي

6- آخر شهادة علمية حصلت عليها , وتخصصك ؟
شهادة الثانوية ، ومابقى الا اسابيع واتخرج بالدبلوم ان شاء الله .. دعواتكم

7- أطرف موقف مر عليك في دراستك ؟
المواقف كثير لكن من المواقف اللي ما أنساها ..
كان معنا طالب نقل عندنا في ثالث ثانوي وكان مهستر بكل ماتعنيه هالكلمة من معنى ، النحشة يومياً هذي مافيها طقة عصا عنده شي روتيني مثل الفسحه ، الزبدة الوكيل عندنا طقه الشيب من هالولد .. أبوه شكله عارف وضع ولده ولاهوب يجي ومرة أومره الله وجا للمدرسة بيشوف ولده .. على جيته للمدرسة وقربه من باب المدرسة كان ولده فوق الباب بيطمر ههههههههه من زود بجاحته ينحاش من البوابة الرئيسية عاد الولد فوق الباب بيطمر وابوه مقبل عليه والتفت وراه لين الوكيل واقف عند باب المبنى ويضحك ( احس انه يضحك من قل الحيلة .. عجز فيه ) وحنا نطل عليه من فوق مع الدريشة .. اليوم هذاك مر كله ضحك في ضحك والى الان كل ماتذكرت الموقف وملامح وجهه هالمنسم ضحكت
بالمناسبه له مقطع دعائي للبيبسي في اليوتيوب
هــنــا

8- أصعب موقف مر عليك في دراستك ؟
أصعب موقف كان في الاجازة الصيفية بين اولى ثانوي وثاني ثانوي .. كنت راسب في مادة الكيمياء في فصلين وكانت مرحلة صعبه الاجازة هذيك كلها قضيتها مع الاستاذ جعفر الله يذكره بالخير لما حفظت الكيمياء حفظ

الواجب أمرره لـ /
domo3 ،فـيّ ،نـجـلاء ،الأخيلية ،حمامة بيضاء ، ندى الفجر